Xalıq, ásirese, jas áwlad wákilleri tárepinen sanitariya-gigiena qurallarınan paydalanıw imkaniyatların jáne de keńeytiw maqsetinde 2025-jıl 1-maydan baslap Sanitariya-epidemiologiyalıq tınıshlıq hám jámiyetlik salamatlıq komiteti tárepinen «Taza qollar» baǵdarlaması ámelge asırıladı.

Bul haqqında «Ózbekstan – 2030» strategiyasın «Qorshaǵan ortalıqtı qorǵaw hám «jasıl» ekonomika jılında ámelge asırıwǵa baylanıslı mámleketlik baǵdarlaması» haqqındaǵı Ózbekstan Respublikası Prezidenti Pármanı joybarında atap ótilgen.
Baǵdarlamanıń engiziliwi sebepli tómendegi nátiyjelerge erisiledi:
– jámiyetshiliktiń pikiri tiykarında barlıq densawlıqtı saqlaw hám bilimlendiriw mákemelerinde qol juwıw orınları zárúr sanitariya-gigiena quralları menen támiyinlenedi;
– sanitariya-gigiena xanalarınıń texnikalıq jaǵdayı jaqsılanadı;
-sanitariya-gigiena xanaları jańadan qurılıp atırǵan mákemelerde imarattıń ishki bóliminde jaylastırıladı;
– barlıq túrdegi jámiyetlik sanitariya-gigiena xanaları, sonıń ishinde, ulıwma awqatlanıw shólkemlerin sanitariya-gigiena quralları menen támiyinlewge baylanıslı baǵdarlama qabıl etiledi;
– 2025-jıl 1-avgustqa shekem Jáhán densawlıqtı saqlaw shólkemi hám BMShtıń xalıqaralıq ekspertleri tartılǵan halda respublikanıń barlıq sociallıq taraw mákemelerinde «2025-2028-jıllarda Ózbekstanda sanitariya-gigiena sistemasın jaqsılaw» baǵdarlaması joybarı islep shıǵılıp, Ministrler Kabinetine kirgiziledi;
– áhmiyetlisi, mámlekettiń sanitariya-epidemiologiya jaǵdayı hám xalıqtıń salamatlıǵı jaqsılanadı.
«Taza qollar» baǵdarlaması densawlıqtı saqlaw hám bilimlendiriw mákemelerinde sanitariya-gigiena xanalarınıń texnikalıq jaǵdayın jaqsılawǵa xızmet etedi.
Maǵlıwmat ushın, Prezident Pármanı joybarı «Ózbekstan-2030» xalıq strategiyası onlayn portalında keń jámiyetshiliktiń dodalawına qoyılǵan. Joybar 2025-jıl 22-yanvarǵa shekem keń jámiyetshilik hám ekspertlik dodalawlarınan ótkeriledi. Onda siz de belsene qatnasıp, usınıs-pikirlerińizdi uzbekistan2030.uz onlayn hám @Ekologiyayilibot telegram botı arqalı jiberiwińiz múmkin!

Qaraqalpaqstan xabar agentligi