Mámleketimiz basshısı medicina mákemelerin úskenelew hám xızmetlerdiń sapasın arttırıwǵa baylanıslı usınıslar prezentaciyası menen tanıstı.

Xalıqtıń salamatlıǵın bekkemlew hám emlewdiń sapasın arttırıw maqsetinde emlewxanalar zamanagóy úskeneler menen támiyinlenbekte. Onıń ushın byudjetten hár jılı keminde 100 milliard sum ajıratılmaqta. Sonday-aq, ótken jıldıń ózinde medicinanı joqarı texnologiyalıq úskeneler menen támiyinlew ushın 200 million dollar sırt el investiciyası, 94 million dollar grant tartıldı.
Nátiyjede aldın tek respublikalıq mákemelerde bolǵan kompyuter tomografı, magnit rezonanslı tomograf, antiograflar házir wálayatlarda, onlaǵan rayonlarda da bar. Bul qánigelesken xızmet xalıqqa jáne de jaqınlastı, degeni.
Bıyılǵı jılı bul maqsetlerge mámleket esabınan 200 milliard sum ajıratılǵan. Sonday-aq, medicinaǵa 370 million dollar sırt el investiciyası kirgiziliwi mólsherlengen.
Prezentaciyada medicina mákemelerin úskenelew boyınsha rejeler bildirildi.
Atap aytqanda, Aziya rawajlanıw bankiniń 100 million dollar qarjısı esabınan respublikadaǵı 230 tuwıw mákemesi ushın 45 túrdegi 21 mıń medicinalıq úskene hám 6 reanimoyuil satıp alınadı.
Germaniyanıń KfW bankiniń 30 million evro qarjısı esabınan Qaraqalpaqstan hám Xorezmdegi 19 dan medicina mákemesi júrek –qan tamır keselliklerin emlewshi 862 úskene menen támiyinlenedi. Jáne usı banktiń 13,5 million evro grantı arqalı Termiz qalasında oqıw orayı, studentlerdiń turaq jayı qurıladı. Bul oray zamanagóy oqıw-simulyaciya hám málimleme texnologiyaları menen úskenelenedi.
Mámleketimiz basshısı úskenelew bul máseleniń tek bir bólegi ekeni, olarda isley alatuǵın maman qánigelerdi házirden tayarlaw kerek ekenligin atap ótti. Tiyisli mákemelerdegi shıpaker hám miyirbiykelerdi qosımsha oqıtıw wazıypası qoyıldı.
Úskenelerden nátiyjeli paydalanıw da áhmiyetli. Máselen, wálayatlarda angiograflar júklemesi ortasha 34 procent. Tomograf boyınsha jaǵday da hár túrli.
Sonlıqtan, hákimlikler menen birge, mámleketlik emlewxanalardaǵı joqarı texnologiyalıq úskenelerden nátyjeli paydalanıw boyınsha autsorsing hám jeke menshik sheriklik joybarları jolǵa qoyılatuǵını belgilendi.

ÓzA