Qaraqalpaqstan Respublikası Densawlıqtı saqlaw ministrligi tárepinen «Doslıq úyi»nde «Grant jazıw hám utıp alıw» atamasında seminar ótkerildi.

Oǵan ministrlik quramındaǵı barlıq emlew profilaktikalıq mákemeleriniń, qalalıq hám rayonlıq medicina birlespeleriniń xızmetkerleri qatnastı.
Seminarda «Grant park»tiń grant penen islesiw sektorınıń qánigesi G.Nurnazarova, Qaraqalpaqstan Respublikası Densawlıqtı saqlaw ministrliginiń investiciyalardı tartıw hám mámleketlik-jeke menshik sheriklik hám autsorsingti rawajlandırıw sektorınıń bas qánigesi Z.Palwaniyazova xalıqaralıq hám jergilikli grant joybarlarında qatnasıw hám utıp alıw usılları tuwralı maǵlıwmatlar berdi.
– Xalıqaralıq shólkemlerdiń grantların alıwda hár qıylı baslama hám joybarlardı qollap-quwatlaw maqsetinde shólkemlestirilgen jańa “Grand Park” joybarın tanıstırıp atırǵanımızdan quwanıshlımız,-deydi Respublikalıq balalar reabilitaciyası orayınıń shıpakeri Zulfiya Doshekenova.
Joybardıń maqseti – grant alıw procesinde másláhátler beriw, arza tayarlawda járdemlesiw hám qollap-quwatlaw arqalı belsendi hám perspektivalı joybarlardı jańa basqıshqa kóteriwge járdemlesiw bolıp esaplanadı. Bul joybar Qaraqalpaqstan Respublikası Joqarǵı Keńesiniń járdeminde ámelge asırılıp atırǵanı onıń áhmiyetli hám isenimli ekenligin kórsetedi.
Grand Park innovaciyalıq ideyalar rawajlanatuǵın, talantlı insanlar óz maqsetlerin ámelge asıra alatuǵın maydanǵa aylanatuǵınına isenemiz.
Ilajda qatnasıwshılarǵa tiykarınan xalıqaralıq grantlardı izlew hám tartıw, grantlar ushın buyırtpalar tayarlaw hám tapsırıw, grant joybarların muwapıqlastırıw hám basqarıw, qarjı, esap-sanaq hám grantlar boyınsha esabat tapsırıw, grant joybarlarınıń nátiyjeliligin monitoring etiw hám bahalaw, xalıqaralıq donorlar hám birge islesiwshiler menen óz-ara sóylesiw máseleleri boyınsha túsinikler berildi.
Seminar dawamında qatnasıwshılar ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.