Mámleketimizde isbilermenlik hám fermerlikti rawajlandırıw boyınsha alıp barılıp atırǵan ilajlardıń nátiyjesin orınlarda erisilip atırǵan tabıslarda kóriwimizge boladı. Beruniy rayonında da bul baǵdarda, jaqsı nátiyjeler kózdi quwandıradı.

Rayondaǵı Qızıl qala awıl puqaralar jıyınında 1024 shańaraq bolıp, aymaqta jasawshılar tiykarınan diyqanshılıq hám sharwashılıq penen shuǵıllanadı. 2022-2024-jıllar dawamında xalıqqa jámi 143 gektar ijaraǵa berilgen jer maydanlarınan ónimli paydalanıp, dáramat alıp kelmekte. «E-auksion» elektron tańlawı arqalı diyqan xojalıǵın júrgiziw ushın puqaralarǵa ajıratılǵan jer maydanlarında «Bir kontur-bir ónim» principi tiykarında qawın jetistiriw jaqsı jolǵa qoyılǵan. Atap aytqanda, Mansur Xudaybergenov aymaqtaǵı diyqan xojalıqlardaǵı 10 gektar jer maydanlarında jetistirilgen qawınlardı may ayına shekem saqlap, respublikamızdıń túrli orınlarına jetkerip beredi. Házirgi waqıtta qawın saqlaytuǵın qoymaxanasında 20 mıńnan aslam qawın saqlanıp kelinbekte.
Ózbekstan Respublikası Prezidentiniń «Kishi biznesti rawajlandırıwdı qarjılay institucional qollap-quwatlaw ilajları haqqında» ǵı qararına tiykarlanıp, isbilermenge túyeshilikti rawajlandırıw, xalıqqa sút hám gósh ónimlerin jetkerip beriw ushın 80 mln sum muǵdarındaǵı kredit qarjıları ajıratılǵan bolıp, házirgi waqıtta awılda túyeshilik keń rawajlanbaqta. Tiykarınan isbilermen túye baǵıw arqalı ayına 3 mln sumnan aslam dáramat tappaqta.
Sonday-aq, Sayxunabad hám Úyshi tájiriybesi tiykarında awıl puqaralar jıyını aymaǵında alıp barılıp atırǵan jumıslar nátiyjesinde xalıqtıń jasaw shárayatı jaqsılanıp, dáramatı artpaqta. Atap aytqanda aymaq turǵını Sevara Buvajanova óz shańaraǵında 200 den aslam túye hám shaytan tawıqlardı baǵıp kelmekte. Shańaraqta kúnine 120 danadan aslam máyek jetistirilip, xalıqtıń máyek ónimine bolǵan talabın qanaatlandırıp kelmekte. Shańaraqqa ortasha esapta ayına 3 mln sum sap payda dáramat kirgizilmekte.
-Mámleketimizde isbilermenlik hám fermerlik penen shuǵıllanıw ushın barlıq imkaniyatlar jaratılıp, kóplegen jeńillikler berilmekte. Tek ǵana istiń kózin bilip, miynet etiw kerek. Miynet etseń, shańaraǵıńdı da baǵasań, xalıqqa da xızmet eteseń,-deydi S.Buvajanova.
Álbette, xalqımızdıń «Diyqanshılıq bári bes, sharwashılıq oǵan es», degenindey, ázelden mal sharwashılıǵı hám diyqanshılıqtı qosa alıp barıp, kúneltip kelgen xalqımızdıń búgingi ayaq alısı da usı tarawlarda jaqsı nátiyjeler menen kózge taslanǵanı molshılıqtan derek beredi.

G.Turdıshova, Qaraqalpaqstan xabar agentligi sholıwshısı