Sawda-sanaat palatasınıń belsendi aǵzası, «QORAZBEK ATA STROY» JShJ direktorı, jas isbilermen Azimbay Sıdıkov búgingi kúnde qurılıs materialların satıw menen bir qatarda óndirislik jumısın da jolǵa qoydı.

Áhmiyetli tárepi, Sawda-sanaat palatasınıń tikkeley qollap-quwatlawı tiykarında isbilermen A.Sıdıkov 2024-jıldıń dekabr ayında Qazaqstan Respublikasınıń Aqtaw qalasında shólkemlestirilgen «Made in Uzbekistan» sawda-yarmarkasında kárxanası tárepinen islep shıǵarılǵan ónimler menen belsene qatnastı.
― Óz jumısımızdı 2011-jılı basladıq. Búgingi kúnde kárxanamızda jámi 12 puqara turaqlı jumıs penen támiyinlengen bolıp, Túrkiya texnologiyası tiykarında 40 túrden aslam zamanagóy akril tipindegi vannalar islep shıǵarılmaqta. Aldaǵı waqıtları kárxanamızdıń jumısların ele de rawajlandırıp, «AsiaLuxBaths» brendi astında islep shıǵarılǵan ónimlerimizdi qońsı respublikalarǵa eksport etiwdi rejelestirip atırmız,-deydi isbilermen A.Sıdıkov.
Házirgi waqıtta Qazakstanlı iri biznes iyeleri isbilermenniń ónimlerine úlken qızıǵıwshılıq bildirip, birge islesiw boyınsha sóylesiwler alıp barılmaqta. Nókis qalasında jańa brend astında islep shıǵarılıp atırǵan zamanagóy vannalarǵa isbilermen 10 jıldan aslam múddette xızmet atqaradı, dep kepillik bermekte.

Qaraqalpaqstan xabar agentligi