YuNESKOnıń Parijdegi bas rezidenciyasında Ózbekstannıń YuNESKO Atqarıw keńesi aǵzalıǵına kandidaturasın rásmiy túrde alǵa qoyıwǵa baǵıshlanǵan ushırasıw ótkerildi.

Onda Mádeniyat hám kórkem ónerdi rawajlandırıw qorınıń baslıǵı Gayane Umerova, Ózbekstannıń YuNESKO janındaǵı turaqlı wákili Kamol Muxtorov hám YuNESKO Atqarıw keńesiniń baslıǵı Vera Lakey qatnastı.
Ushırasıwda mámlekettiń YuNESKO maqsetlerine sadıqlıǵı hám shólkem jumısına qosıp atırǵan turaqlı úlesi atap ótildi. Bul ushırasıw waqtında Ózbekstan 2027-2030-jıllar dawamında YuNESKO Atqarıw keńesi aǵzalıǵına kandidaturasın rásmiy túrde alǵa qoyǵanı málim etildi.
Tárepler mádeniyatlararalıq qarım-qatnastı bekkemlew, jańa baslamalardı qollap-quwatlaw hám 2025-jılı noyabr ayında Samarqandta ótkeriliwi rejelestirilgen YuNESKO Bas konferenciyasınıń 43-sessiyası sheńberinde dodalanıwı kútilip atırǵan joybarlar boyınsha da pikir alıstı.
Qordıń málimleme xızmetiniń xabarına bola, ushırasıwda Ózbekstannıń bul baslaması xalıqaralıq mádeniy birge islesiwge sadıqlıǵı hám ámeliy jumısınıń ayqın úlgisi sıpatında atap ótildi.

N.Ziyodullaeva, ÓzA