Prezident Shavkat Mirziyoev xalıqtıń bántligin támiyinlew hám jańa kózqaraslar tiykarında kámbaǵalıqtı qısqartıwǵa baylanıslı ilajlar prezentaciyası menen tanıstı.

Bıyıl 5 million 200 mıń puqaranıń bántligin támiyinlew hám 1,5 million xalıqtı kámbaǵallıqtan shıǵarıw maqset etilgen. Birinshi ret 60 rayon hám qalal kámbaǵallıqtan hám jumıssızlıqtan jıraq aymaqqa aylandırıladı.
Máhálle bankirleri menen birge 1,5 million xalıq turaqlı jumısqa jaylastırılıp, 2 millionnan aslam adam bizneske keńnen tartıladı. Usı maqsette bıyıl kishi biznes joybarlarına jámi 120 trillion sum kredit ajıratıladı.
Aldıńǵı sırt el tájiriybesi tiykarında 32 baǵdarda kámbaǵallıqtı qısqartıw boyınsha jańa kózqaraslar jolǵa qoyıladı. Mısalı, 300 awır máhállede ulıwma quwatlılıǵı 107 megavatt bolǵan quyash elektr stanciyaları iske qosıladı. Olarǵa kámbaǵal shańaraqlardıń aǵzaları kooperaciya tiykarında jumısqa alınadı.
123 rayonda kámbaǵal xalıq 20 mıń gektar toǵay hám náller jaratıw hám dárilik ósimlikler jetistiriwge tartıladı. Olar ekken hár 100 terek ushın 375 mıń sum subsidiya tólenedi.
Turizm potencialı bar orınlarda miyman jayları hám asxanalar, belgili bir pochta bólimlerinde elektron kommerciyalıq oraylar ashılıp, kámbaǵal shańaraq wákilleri jumısqa alınadı.
Ulıwma, usı jılı 6 mıń 472 máhállede jańa kózqaraslar tiykarında joybarlar ámelge asırılıp, 210 mıń xalıq kámbaǵallıqtan shıǵarıladı.
Shetki aymaqlardaǵı, awır kategoriyadaǵı awıllarǵa ayrıqsha itibar qaratıladı. Ózbekstan máhálleleri associaciyası olardıń miynet etiwge qızıǵıwshılıǵın oyatıp, iyek artıwshılıqtı azaytıwǵa, kámbaǵal shańaraqlardıń miynetin qollap-quwatlawǵa, juwapker boladı.
Mámleketimiz basshısı 2025-jıl jumıssızlıq hám kámbaǵallıqtı qısqartıwda sheshiwshi jıl bolıwın jáne bir márte atap ótip, bul baǵdarda ilajlardı tártipli hám mánzilli ámelge asırıw boyınsha kórsetpeler berdi.
Kámbaǵallıqtı qısqartıw hám bántlik ministrligine bul wazıypalardıń orınlanıwın qatań qadaǵalawǵa alıw tapsırıldı. Hár bir joybar, hár bir ilaj elektron platformaǵa kirgizilip, jaratılǵan jumıs orınları salıq bazasında tekseriliwi belgilendi.
Jergilikli hákimlik xızmetkerleri hám «máhálle jetiligi» ushın oqıwlar shólkemlestiriw, jaqsı tájiriybelerdi úgit-násiyatlaw áhmiyetli ekenligi aytıldı.

ÓzA