Ózbekstan Respublikası Prezidenti janındaǵı Mámleketlik basqarıw akademiyasında «Rawajlanıw startegiyası» orayı menen birgelikte Ózbekstan Respublikası Prezidentiniń «Ózbekstan – 2030» strategiyasın «Qorshaǵan ortalıqtı qorǵaw hám «jasıl» ekonomika» jılında ámelge asırıwǵa baylanıslı baǵdarlaması haqqındaǵı pármanı joybarın jámiyetshiliktiń dodalawı shólkemlestirildi.

Mámleketlik basqarıw akademiyasınıń rektorı Adham Bekmurodov mámleketimiz basshısı tárepinen alıp barılıp atırǵan xalıqshıl siyasat usı párman joybarında áwlelengenin atap ótti. «Rawajlanıw strategiyası» orayı atqarıwshı direktorı Еldor Tulyakov joybar haqqında qısqasha maǵlıwmat berdi.
Mámleketlik baǵdarlama joybarı 2025-jılı 8-yanvardan baslap «Rawajlanıw strategiyası» orayınıń www.uzbekistan2030.uz portalına keń jámiyetshiliktiń dodalawı ushın jaylastırıldı. Bul portal arqalı xalıqqa strategiya hám mámleketlik baǵdarlamalardıń orınlanıwı, sonday-aq, hár bir maqset hám kórsetkishler boyınsha óz pikir-usınısların qaldırıw hám olardı bildiriw imkaniyatı jaratılǵan.
Mámleketlik baǵdarama joybarı búgingi globallasıw procesinde jańa Ózbekstannıń xalıqtıń abadanshılıǵı, tınıshlıǵı, demokratiya hám insan xuqıqlarınıń kepilligin támiyinleytuǵın erkin jámiyet hám ádil mámleket qurıwǵa qaratılǵan konceptual hújjet ekenligi ayrıqsha atap ótildi.
Mámleketlik baǵdarlama joybarında 295 ámeliy ilaj, 87 normativlik-huqıqıy hújjet, 269 maqsetli kórsetkish belgileniwi názerde tutılmaqta.
Bárinen burın, insan faktorına úlken itibar qaratılǵan bolıp, xalıqtıń salamatlıǵın jaqsılaw, «jasıl» rawajlanıw hám ekologiyalıq turmıs tárizin qáliplestiriw tiykarǵı maqset etip belgilengen. Respublikamızdıń barlıq aymaqlarınıń ekologiyalıq kelbetin ózgertiw, tábiyǵıy resurslardı únemlew hám tábiyat penen úylesken halda turaqlı rawajlanıwdı támiyinlewge úlken itibar qaratılǵan. Sonday-aq, ósimlik hám xaywanat dúnyasın qorǵaw, «jasıl ekonomika» principlerin engiziw, ekonomikanı dekarbonizaciyalaw sıyaqlı máseleler da áhmiyetli wazıypalar sıpatında ayrıqsha belgilep qoyılǵan.
Ilajda mámleketlik baǵdarlama joybarı hám onıń tiykarǵı baǵdarları, hár bir insanǵa óz potencialın ámelge asırıwı ushın múnásip sharayatlardı jaratıw, suw resursların únemlew hám qorshaǵan ortalıqtı qorǵaw, qáwipsiz hám tınıshlıqtı súyiwshi mámleket principine tiykarlanǵan siyasattı izbe-iz dawam ettiriw baǵdarında belgilenip atırǵan wazıypalardıń mánis-mazmunı temalarında «Rawajlanıw strategiyası» orayınıń qánigeleri tárepinen bayanatlar usınıs etildi.
Mámleketlik basqarıw akademiyası professor-oqıtıwshıları hám tıńlawshıları, doktorant-izertlewshiler, erkin-izleniwshiler, «Rawajlanıw orayı» xızmetkerleri hám ǵalaba xabar qurallarınıń wákilleri qatnasqan ilajdıń juwmaǵında joybardı jáne de jetilistiriw hám belgilengen wazıypalardıń orınlanıwın nátiyjeli monitoring etiw boyınsha usınıslar islep shıǵıldı.

Norgul Abduraimova, ÓzA