Miynet qaharmanınıń yubileyi belgilendi

Ótken ásirdiń 70-80-jılları respublikamızda awıl xojalıǵı tarawı jaqsı rawajlanıp, xalqımız arasınan kóplegen miynet qaharmanları jetilisip shıqtı.
Solardıń biri, kegeylishi ataqlı mexanizator Úsenbay Baltaniyazov edi. 1940-jılı Kegeyli rayonında tuwılǵan ol qarshadayınan awıl xojalıǵına aralasıp, awılda jumısshı, 1958-jıldan baslap Xalqabad xojalıǵında mexanizator, brigadir, uchastka baslıǵı sıyaqlı juwarkershilikli lawazımlarda 40 jıldan aslam waqıt jemisli miynet etti.
1966-70-jılları Úsenbay Baltaniyazov basqarǵan brigada aǵzaları paxta jetisiriw boyınsha jarısta rayonda birinshilikti qolǵa kirgizip, elimizdiń eń joqarı ordeni menen sıylıqlanadı. Bul sıylıqtan ruwxlanǵan jas azamat óziniń órnekli islerin dawam ettirip, toǵızınshı bes jıllıqta da birinshilikti qoldan bermeydi hám 1973-jıldıń 10-dekabr kúni Miynet qaharmanı ataǵına miyasar boladı.
Úsenbay Baltaniyazov óziniń miynet jolı dawamında eki shaqırıq Burınǵı awqam Keńesine deputat bolıp saylanadı. Onıń deputatlıq belsendiligi arqasında, Júzimbaǵ awılında mektep hám balalar baqshaları qurılǵan.
Házirgi waqıtta ol 85 jasqa shıǵıp, perzentleri hám aqlıq-shawlıqlarınıń qorshawında ǵarrılıq gáshtin súrmekte.
Kegeyli rayonındaǵı 21-sanlı ulıwma bilim beriw mektebinde elimizge belgili awıl xojalıǵı tarawı pidayı xızmetkeri, Miynet qaharmanı Úsenbay Baltaniyazovtıń 85 jıllıǵına baǵıshlanǵan «Úsh áwlad ushırasıwı» bolıp ѳtti.
Keshede Nuranıy qorı Qaraqalpaqstan Respublikalıq bólimi baslıǵınıń orınbasarı G. Qalmuratov, rayon hakiminiń orınbasarı A.Tóremuratov, Nuranıy qorı rayonlıq bóliminiń baslıǵı T.Davletov hám basqalar miynet veteranınıń úlgili ѳmiri hám miynet jolı haqqında aytıp, yubilyardı múbárek jasları menen qutlıqladı hám oǵan estelik sawǵalar tapsırdı.
Keshede Úsenbay ata Baltaniyazov ta shıǵıp sóylep, ózine kórsetip atırǵan bunday joqarı húrmet hám izzet ushın shólkemlestiriwshilerge minnetdarshılıǵın bildirdi.
-Azanda ѳtsem de, túste ѳtsem de, keshte qaytsam da tırıldap paxta atızdan shıqpaydı, bul qashan dem aladı eken, -dep awıldıń adamları sırtımızdan aytıp júretuǵın edi. Sonıń arasında birew kelip, arqamızdan bir qaǵıp ketse, sol marapattan sharshaǵanımızdı bilmey isley beretuǵın edik. Sol islegen biyminnet miynetlerim, haq kѳkiregimniń arqasında jaratqan maǵan usınday ѳmir, baxıtlı kekselik dáwranın berdi, -deydi yubilyar ѳziniń ótken ómirine kóz jiberip.
Ótkerilgen bul yubiley keshesi ilaj qatnasıwshılarında úlken tásir qaldırıp, ósip kiyatırǵan jas áwlad wákilleri ushın haqıyqıy turmıs sabaǵı boldı, desek aljaspaǵan bolamız.

Adilbay Orazov,
Qaraqalpaqstan xabar agentligi sholıwshısı