Ózbekstan Respublikası Qurallı Kúshleri dúzilgeniniń 33 jıllıǵı hám «Watan qorǵawshıları kúni» bayramı múnásibeti menen Taxtakópir rayonlıq Mádeniyat orayında rayon belsendileri, nuranıylar, jaslar hám áskeriy taraw xızmetkerleriniń qatnasıwında saltanatlı bayram ilajı bolıp ótti.
Ilajda dáslep Ózbekstan Respublikası hám Qaraqalpaqstan Resublikasınıń mámleketlik gimnleri jańladı.
Bayram ilajın Taxtakópir rayonı hákimi Jambul Adilov kiris sóz benen ashıp, barlıq áskeriy taraw xızmetkerlerin, veteranlar hám xalqımızdı bayram menen qutlıqladı.
Bunnan soń, rayonlıq Qorǵanıw isleri bólimi baslıǵı, podpolkovnik J.Sultanov hám Áskeriy injenerlik-qurılıs batalon komandiri, podpolkovnik A.Orzievlar sózge shıǵıp, húrmetli Prezidentimiz, Qurallı Kúshler Joqarı Bas Sárkardasınıń ayırıqsha itibari menen tarawda erisilip atırǵan jetiskenliklerge keń túrde toqtalıp ótti.
Bayram ilajı dawamında bir qatar taraw pidayıları, múddetli áskeriy xızmetkerler rayon hákimliginiń Húrmet jarlıǵı, sonday-aq, jaslardı áskeriy Watansúyiwshilik ruwxında tárbiyalaw baǵdarında ámelge asırılıp atırǵan jumıslarda belsendilik kórsetken mektep direktorları hám arnawlı pán muǵallimleri rayonlıq Qorǵanıw isleri bóliminiń «Minnetdarshılıq xatı» hám bahalı sawǵaları menen sıylıqlandı.
Bayram ilajı áskeriy saxnalıq kórinisler hám kórkem óner tarawı xızmetkerleriniń yoshlı koncert baǵdarlaması menen kewilli dawam etti.
Adilbay Orazov,
Qaraqalpaqstan xabar agentligi sholıwshısı