Prezidenttiń «Ózbekstan -2030 strategiyasın «Qorshaǵan-oralıqtı qorǵaw hám jasıl ekonomika jılı»da ámelge asırıwǵa baylanıslı mámleketlik baǵdarlama haqqında»ǵı pármanı joybarı jámiyetshiliktiń dodalawına qoyıldı.
Joybarda 2025-jılı ósimlikler hám haywanatlar dúnyasın qorǵaw, kóbeytiw hám olardı keyingi áwladqa jetkeriw boyınsha bir qatar jumıslardı ámelge asırıw názerde tutılǵan.
Sonıń ishinde, 2025-jıl 1-sentyabrden baslap jabayı halda ósiwshi ósimliklerdi jıynaw hám tayarlaw ushın tastıyıqlanǵan kvotalar hám ósimlik dúnyası obyektlerinen arnawlı paydalanıw ushın ruqsatnamalardı elektron aukcion arqalı beriw engiziledi.
Onda:
-kvotalar Ilimler akademiyası tárepinen hár jılı anıqlanatuǵın ósimlik rezervi tiykarında qáliplestiriledi;
– kvota hám ruqsatnamalar Еkologiya, qorshaǵan-ortalıqtı qorǵaw hám klimat ózgeriwi ministrligi tárepinen tastıyıqlanıp, aukcionǵa shıǵarıladı.
Sonday-aq, haywanat dúnyası shıǵınlarınıń ornın qaplaw maqsetinde 2025-jıl 1-sentyabrden 2028-jıl 1-yanvarǵa shekem Ózbekstan Respublikası aymaǵında ań awlawǵa moratoriy (sheklew) engiziledi.
Onda:
-moratoriy fermalar, pitomnikler, inkubatorlar, balıqshılıq pitomnikler hám basseyn xojalıqlarında saqlanıp atırǵan hám (yaki) jetistiriletuǵın jabayı haywanlardı awlaw hám sanitar maqsetlerde ań awlawǵa qollanılmaydı;
– ańshılarǵa alternativ oqıw sıpatında aymaqlarda oq atıw sportına qáliplestirilgen arnawlı poligonlarda xızmet kórsetiw jolǵa qoyıladı;
-qalalardaǵı tábiyǵıy suw saqlaǵıshlar ixtiofaunasınıń populyaciyasın qayta tiklew maqsetinde respublikanıń oraylıq qalalarınan aǵıp ótiwshi dárya hám saylarda 2025-jıldan baslap, hár jılı 15 tonnadan az bolmaǵan shabaqlardı kóbeytiw jumısları ámelge asırıladı,-dep málimleme beredi xabar.uz saytı.
Qaraqalpaqstan xabar agentligi