Qaraózek rayonındaǵı Mádeniyat sarayında Ózbekstan Respublikası Qurallı kúshleri dúzilgeniniń 33 jıllıǵı hám Watan qorǵawshılar kúni keń túrde belgilenip ótildi.

Oǵan rayon hákiminiń orınbasarları, áskeriy taraw xızmetkerleri, huqıq qorǵaw uyımı wákilleri, nuranıylar hám jaslar qatnastı.
Onda shıǵıp sóylewshiler ilaj qatnasıwshıların bayram menen qutlıqlap, sońǵı jılları elimizde Prezidentimizdiń basshılıǵında Qurallı kúshlerimizdi reformalaw, milliy armiyamızdıń materiallıq-texnikalıq bazasın bekkemlew baǵdarında ámelge asırılıp atırǵan jumıslar, áskeriy xızmetkerlerge jaratılıp atırǵan itibar hám ózgerisler, múddetli xızmetin ótep kelgen jaslarımızǵa berilgen imkaniyatlar menen jeńillikler haqqında keń túrde sóz etip, watandı qorǵaw hár birimizdiń ádiwli minnetimiz ekenligin atap ótti.
Ilajda bayram múnásibeti bir topar nuranıylar menen huqıq qorǵaw uyımları xızmetkerleri hám mekteplerdegi shaqırıqqa shekemgi baslawısh tayarlıq páni muǵallimlerine rayon hákimliginiń Húrmet jarlıqları tapsırıldı.
Bayram ilajı ana-Watan hám ǵárezsizligimizdi jırlawshı koncert baǵdarlaması menen dawam etti.

Adilbay Orazov,
Qaraqalpaqstan xabar agentligi sholıwshısı