Ózbekstan máhálleleri assosaciyası Qaraqalpaqstan Respublikası basqarmasınıń májilisler zalında Basqarma tárepinen 2024-jıl dawamında ámelge asırılǵan jumıslar hám kelesi «Qorshaǵan ortalıqtı qorǵaw hám «jasıl» ekonomika» jılındaǵı rejelerdi dodalawǵa baǵıshlanǵan baspasóz ánjumanı shólkemlestirildi.
Oǵan Basqarma basshıları, Nókis qalası hám rayonlıq bólimlerdiń baslıqları, ǵalaba xabar qurallarınıń wákilleri qatnastı.
Ánjumanda Basqarma baslıǵı S.Turmanovtıń Ózbekstan máhálleleri assosaciyası Qaraqalpaqstan Respublikası basqarması hám onıń bólimleri tárepinen xalıq penen mámleket arasındaǵı «kópir» wazıypasın ámelge asırıwshı erkin hám xalıqshıl strukturaǵa aylanıwına járdemlesiw, ulıwma máhálle jetiliginiń jumısın nátiyjeli shólkemlestiriwde jıl dawamında ámelge asırılǵan jumısları boyınsha bayanatı tıńlandı.
Bayanatta atap ótilgenindey, Prezidentimizdiń 2023-jıl 21-dekabrdegi 209-sanlı pármanı hám 402-sanlı qararı tiykarında Ózbekstan máhálleleri assosaciyası shólkemlestirilip, máhállelerdi basqarıwda pútkilley jańasha sistema-«Máhálle jetiligi»niń jumısı jolǵa qoyıldı. Áhmiyetlisi, búgingi kúni gúllán xalqımız «Máhálle jetiligi»niń jámiyetimiz turmısındaǵı tutqan ornın ayqın sezinbekte.
-Ótken 2024-jılı respublikamız boyınsha 36 ózin-ózi basqarıw uyımlarınıń imaratları jańadan qurılıp, 4 máhálle keńsesine aǵımdaǵı, 3 máhálleniń imaratı kapital ońlaw jumısları júrgizilip paydalanıwǵa tapsırıldı. Usı jerde Nókis rayonındaǵı «Diyqan arna» mákan puqaralar jıyınında ámelge asırılǵan keń kólemli qurılıs-abadanlastırıw jumısların da ayrıqsha atap ótiwimiz kerek, –dedi Basqarma baslıǵı S.Turmanov.-Itibarlı tárepi sonda respublikamız boyınsha derlik barlıq puqaralar jıyınları keńseleri joqarı tezliktegi internet tarmaǵına jalǵanǵan bolıp, 2024-jılı barlıq jıyın baslıqları 452 planshet, sonıń ishinde, 274 máhálle kompyuter, 234i bolsa, mebel úskeneleri menen támiyinlendi. Sonıń menen birge, Ózbekstan Respublikası Prezidentiniń 2022-jıl 22-avgusttaǵı PQ-357-sanlı qararı tiykarında, búgingi kúni barlıq ózin-ózi basqarıw uyımları Máhálleniń birden-bir platforması-«Sanlı máhálle» sistemasına biriktirildi.
Sonday-aq, ilajda elimiz Prezidentiniń arnawlı qararları tiykarında ámelge asırılǵan qurılıs hám abadanlastırıw jumısları, 2025-jılı isleniwi tiyis wazıypalar boyınsha keń túrde maǵlıwmatlar berildi.
Ánjumanda jurnalistler tárepinen búgingi kúni keń jámiyetshilikti qızıqtırıp júrgen máseleler boyınsha sorawlar berilip, olarǵa juwaplar alındı.
Adilbay Orazov,
Qaraqalpaqstan xabar agentligi sholıwshısı.