Nókis qalasında Ózbekstan Respublikası Qurallı Kúshleri sistemasında jaslarǵa baylanıslı mámleketlik siyasattıń nátiyjeliligin arttırıw, áskeriy bólim hám shólkemlerde jaslardı qollap-quwatlaw, sonday-aq, elimizde jaslarǵa jaratılıp berilgen sharayatlardan nátiyjeli paydalanıwǵa járdemlesiw maqsetinde, «Jas áskeriyler forumı» ótkerildi.

Qaraqalpaqstan Respublikası Joqarǵı Keńesi hám Ministrler Keńesi, sonıń menen birge, Arqa-batıs áskeriy okrugi sárkardalıǵı, Nókis qalası hákimligi, Ózbekstan jaslar awqamı, Jaslar isleri agentligi menen birgelikte shólkemlestirilgen forumda jas áskeriy xızmetkerler, nuranıylar, «Watan tayanıshı» otryadı aǵzaları hám bir topar jaslar qatnastı.

Forumda Arqa-batıs áskeriy okrugi sárkardasınıń orınbasarı hám basqalar shıǵıp sóylep, ilaj qatnasıwshıların jańa jıl bayramı menen qutlıqladı hám forumnıń maqset hám wazıypaları, 2024-jıl dawamında mámleketlik siyasat boyınsha ámelge asırılǵan jumıslar tuwralı keń túrde maǵlıwmatlar berdi.

Ilajda qaraqalpaqstanlı jaslar da shıǵıp sóylep, jaslardıń arzıw hám maqsetlerine jetiw boyınsha ózleriniń zárúrli másláhát hám keńeslerin berdi. “Mard wǵlon” ordeni iyesi kishi serjant Asliddin Nurmatovtıń ómiri hám xızmet jollarındaǵı jetiskenlikleri qatnasıwshılarǵa jáne de úlken motivaciya berdi.

Forum sońında Arqa-batıs áskeriy okrugi sárkardalıǵı tárepinen atalıqqa alınǵan jaslar menen ámelge asırılǵan islerde belsendilik kórsetken bir topar jas áskeriyler áskeriy okrug sárkardalıǵınıń Húrmet jarlıǵı menen sıylıqlandı.

Qaraqalpaqstan xabar agentligi.