Jańa jıl bayramı hár jılı óziniń ózgesheligi menen yadımızda qaladı. Ásirese, bul bayramdı balalar ózgeshe quwanısh penen kútedi. Hár jılı Húrmetli Prezidentimiz tárepinen mehirge mútáj balalarımız ushın Prezident sawǵalarınıń beriliwi dástúrge aylanǵan bolıp, bıyıl da Jańa jıl aldınan orınlarda balalarǵa arnalǵan Prezident sawǵaları tapsırılmaqta.
Mámleketimizde jas áwladqa bolǵan ǵamqorlıq hám itibardıń jarqın belgisi bolǵan “Prezident shırshası” bayramı bolsa, kishkene balalardıń eń súyikli bayramlarınıń biri desek qátelespeymiz.
Dástúrge muwapıq, Prezident sawǵaları óz waqtında Qanlıkól rayonına da jetip keldi.
Búgin Qanlıkól rayonındaǵı «Jaslar seyili» maydanına úlken etip ornatılǵan jańa jıl shırshası átirapında bayram ilajı ótkerildi.
Ilajǵa rayon hákimi B.Sultanov, Qaraqalpaqstan Respublikası Ádillik ministri Е.Tursunov, sektor bashıları qatnasıp, rayon xalqın bayram menen qızǵın qutlıqlap, Prezidentimiz tárepinen hár jılı balalarımızǵa beriletuǵın Prezident sawǵaları saltanatlı jaǵdayda tapsırıldı.
Atap ótilgenindey, elimizde balalar bárqulla Prezidentimizdiń itibarı hám ǵamxorlıǵında. Balalar biziń keleshegimiz, erteńgi kúnimizdiń iyesi, iygilikli islerimizdiń dawamshıları hám kózimizdiń nurı. Sonlıqtan da, olarǵa qansha itibar qaratsaq, mehir kórsetsek te az. Olarǵa ǵamxorlıq kórsetiw bolsa, keńpeyil hám miyrimli xalqımızdıń aǵla pazıyletlerinen sanaladı. Al, perzentlerimizdiń bizden de baxıtlı hám abadan turmısta jasawı ushın búgin barlıq múmkinshilikler jaratılıp berilmekte. Bul sawǵalar kóplegen balalarımızdı quwanıshqa bólep, bayram keshesi hár qıylı bayram zawıqları menen dawam etti.
Shıraylı etip bezelgen shırsha átirapında shólkemlestirilgen bayram keshesinde mádeniyat bólimi xızmetkerleri tárepinen tayarlanǵan kewilashar baǵdarlamalar hám koncert nomerleri miymanlar názerine usınıldı.
Qaraqalpaqstan xabar agentligi