Bul ilaj hesh kimdi esnetpedi, zeriktirmedi. Nókis qalasındaǵı 26-sanlı ulıwma bilim beriw mektebinde 1-b klass oqıwshılarınıń álipbe menen xoshlasıw keshesi ótkerildi. Hámme baxtiyar. Balalardan baslap, ata-analar, kempir apa, atalarǵa shekem. Olar perzentleri, aqlıqları sebepli balalıq dáwirlerge qayta oraldı.

«Xosh bol, álipbem» balalar ózleriniń tuńǵısh kitabı menen xoshlaspaqta. «Dúnyadaǵı eń úlken tabıs gilti – hárip tanıw» degen danıshpanlar. Hár bir ul-kız kóksine qıstırılǵan háripler balalar járdeminde ózin sıpatlap berdi. Sol úsh-tórt buwınlı ápiwayı taqmaqlarda tereń máni jasırınǵan. Bálkim, bul balalar yadlap alǵan eń tásirli qosıq shıǵar. Birinshi klass paytımda A háribi bolǵanım eriksiz yadıma tústi. Hár bir saxnalıq kórinisler bizge qayta-qayta balalıqtı esletti, saǵındırdı. Keshe bala edik, mine búgin perzentimiz birinshi klass bosaǵasında. Olardıń mekteptegi dáslepki altın dáwirleri mórlengen foto rolikler, ata-analardıń qatnasıwında ótkerilgen viktorina hám epshillik oyınları, balalardıń jeke hám topar bolıp atqarǵan qosıq hám ayaq oyınları bayramǵa tayarlıq qızǵın bolǵanlıǵın kórsetedi.
– Búgingi sabaqlıqlar nádewir quramalı, – deydi birinshi klass oqıwshısı Tınıbekova Alfiyanıń kempir apası Gúlayım Tóreeva. – Muǵallimniń jas náwqıran kóriniwinde de, yaki tez qartayıp qalıwında da biz ata-analardıń úlesimiz mol boladı. Muǵallim úyretiwi kerek dep barlıq juwapkershilikti onıń moynına júklep qoyıwımız qáte. Ata-analar muǵallimniń járdemshisi, qollawshısı bolsa ǵana bilimlendiriwde haqıyqıy sapa boladı.
Bir insan bar, biz úlken ómirge qádem taslap, úlken nátiyje, lawazımlarǵa erisken demimizde de sol bayaǵı oqıǵan mektebimizde jaslarǵa tálim-tárbiya berip júrgen boladı. Ómirimizde óshpes iz qaldırǵan bul shaxs – birinshi klass muǵállimimiz. Oylap qarasaq ol óz perzentlerinen de kóbirek xalıqtıń balaların qayǵıratuǵın, olarǵa bar kúsh-jigerin, waqtın hám mehirin sarıplaydı.
– Utepova Zuxra Kamalovna uzaq jıllıq bilim hám tájireybege iye pedagoglarımızdan biri, – deydi mektep direktorı Baxadır Akimov. – Búgin ata-analar eń dáslep mektep emes ustaz tańlamaqta. Sol ushın hár bir bilimlendiriw mákemesiniń júzi áne sonday jetik, pidayı muǵallimler sanaladı. Biz usı birinshi klass qarlıǵashları arasınan ele kóplep elimizge, dúnyaǵa belgili insanlar jetilisip shıǵıwına isenemiz hám olarǵa aldaǵı oqıwlarında tabıslar, ustazına bolsa talmas kúsh-ǵayrat tileymiz.

N.Mambetırzaeva,
Jurnalist.
Qaraqalpaqstan xabar agentligi