Házirgi waqıtları xalqımız jańa jıl bayramın kóterińki keypiyatta kútip alıw ushın qızǵın tayarlıqlar kórmekte. Bayram aldınan Tórtkúl rayonı Kelteminar elatında jasawshı awıl turǵınlarınıń quwanıshı óz aldına bolmaqta.
Atap aytqanda, Ózbekstan Respublikası Prezidentiniń 2023-jıl 25-dekabrdegi «2024-2026-jılarda Ózbekstan Respublikasınıń sociallıq hám óndirislik infrastrukturasın rawajlandırıw ilajları haqqında»ǵı qararı tiykarında, usı aymaqta jaylasqan 10-sanlı ulıwma orta bilim beriw mektebine qosımsha 480 orınlıq oqıw imaratınıń qurılısı tolıq pitkerilip, xalıq iygiligi ushın paydalanıwǵa tapsırıldı.
Oqıw dárgayınıń ashılıw máresimine rayon hákimi R.Shamuratov hám awıl nuranıyları qatnasıp, aymaq turǵınları hám mektep jámáátin jańa jıl bayramı hám qosımsha oqıw imaratına iye bolǵanı menen qutlıqlap, olardıń aldaǵı islerine tabıslar tiledi.
Ilajda rayon hákimi hám aymaq jasıúlkenleri tárepinen mektep aldına tartılǵan dástúriy lenta kesilip, qatnasıwshılar oqıw dárgayında oqıwshılar ushın jaratılǵan sharayatlar menen jaqınnan tanıstı.
Maǵlıwmat ushın aytatuǵın bolsaq, ulıwma smetalıq bahası 5 milliard 828 million sum bolǵan bul mekteptiń jańa qosımsha oqıw imaratında oqıwshılar ushın barlıq qolaylılıqlar jaratılıp, onda oqıwshılar zaman talabına say bilim almaqta.
Sonday-aq, jańa jıl bosaǵasında usı rayonnıń «Yaxtilik» mákan puqaralar jıyınında jaylasqan 14-sanlı ulıwma orta bilim beriw mektebiniń de 330 orınlıq jańa oqıw imaratı da bayram sawǵası sıpatında paydalanıwǵa tapsırıldı.
Adilbay Orazov,
Qaraqalpaqstan xabar agentligi sholıwshısı.