Sońǵı jılları elimizde sırt eller menen birge islesiwge ayrıqsha itibar qaratılıp, bul baǵdarda kóplegen jumıslar ámelge asırılmaqta. Ásirese, joqarı oqıw orınları tárepinen alıp barılıp atırǵan isler xalqımızdıń erteńgi kúnge degen isenimin bekkemleydi.
Jaqında Qıtaydıń Shandun tallaw hám test orayınıń prorektorı Wei Liu basshılıǵındaǵı professorlar xızmet saparı menen Berdaq atındaǵı Qaraqalpaq mámleketlik universitetinde boldı.
Miymanlar dáslep universitettiń xalıqaralıq birge islesiw boyınsha prorektorı T.Nurımbetov, biologiya fakulteti dekanı Ya.Ametovlar menen sóylesiwler alıp bardı.
Ushırasıw dawamında dárilik ósimliklerdi úyreniw boyınsha zamanagóy laboratoriyalardı ashıw máselesi dodalandı. Sonıń menen birge, Qıtaydaǵı professor-oqıtıwshılar menen ilimiy tájiriybe almasıw imkaniyatların jolǵa qoyıw hám bul baǵdarda birge islesiwdi bekkemlew máseleleri boyınsha pikir alısıldı. Sóylesiwler barısında, Qaraqalpaqstan jerlerinde ósetuǵın siyrek ushırasatuǵın hám dárilik ósimliklerdi úyreniw hám olardıń farmacevtikalıq imkaniyatların keńeytiw boyınsha perspektivalı rejeler dodalandı. Sonday-aq, qıtaylı professorlar universitettegi ximiya-texnologiya hám biologiya fakultetindegi laboratoriyalardaǵı zamanagóy úskeneler hám ilimiy izertlewlerdi ótkeriw boyınsha qollanılıp atırǵan usıllar menen tanısıp, universitettiń ilimiy potencialı joqarı ekenin atap ótti.
Sonıń menen birge, bul laboratoriyalardan dárilik ósimliklerdi úyreniw boyınsha aldaǵı waqıtları birgeliktegi joybarlarda paydalanıw múmkin ekenligine toqtap ótildi.
Sapar sheńberinde universitet hám Shandun tallaw hám test orayı arasındaǵı keleshektegi birge islesiw memorandumı dúzildi.
Bul ushırasıw eki tárepleme ilimiy-texnikalıq birge islesiwdi rawajlandırıw, xalıqaralıq tájiriybe almasıwdı keńeytiw hám jańa innovaciyalıq joybarlardı ámelge asırıw ushın úlken áhmiyetke iye bolıp tabıladı.
Adilbay Orazov,
Qaraqalpaqstan xabar agentligi sholıwshısı