Taxtakópir rayonında gúzgi-qısqı máwsimde ayrıqsha jaǵdaylardıń aldın alıw boyınsha rayon aymaǵında shólkemlestirilgen arnawlı shtab aǵzaları hám tiyisli taraw wákilleri menen birgelikte azanǵı úyreniw ilajı bolıp ótti.
Ilajda Qaraqalpaqstan Respublikası Ministrler Keńesiniń Korrupciyaǵa qarsı ishki qadaǵalaw bólimi baslıǵı, respublikalıq jumısshı topar aǵzası Batır Matmuratov sózge shıǵıp, gúzgi-qısqı máwsimdi shıǵınsız ótkeriw, kóp qabatlı turaq jaylardaǵı avariyalıq jaǵdaylardı operativ túrde saplastırıw hám sociallıq obyektlerde xalıq ushın qolaylı sharayatlardı jaratıw menen birge, puqaralardıń záhárli gazden zıyanlanıwınıń aldın alıw máseleleri boyınsha zárúrli kórsetpeler berip ótti.
Ilaj dawamında jumısshı topar aǵzaları rayonnıń basqa aymaqlarında bolıp, bul elatlardıń turǵınları arasında da gúzgi-qısqı máwsimde júz beriwi múmkin bolǵan ayrıqsha jaǵdaylardıń aldın alıw boyınsha úgit-násiyat jumısların alıp bardı.
– Taxtakópir rayonı aymaǵında ayrıqsha jaǵdaylar bólimi hám birge islesiwshi shólkemler tárepinen sociallıq obyektler, kóp qabatlı úyler, jeke turaq jaylardıń ısıtıw pechleriniń morıları tazalanıp, jılıtıw sistemaları kózden ótkerilmekte hám órt qáwipsizliginiń aldın alıw boyınsha úgit-násiyat jumısları júrgizilmekte,-deydi operativ bólimshe baslıǵı Ramatulla Ótegenov.-Usınday profilaktikalıq jumıslardıń alıp barılıwına qaramastan, ayırım puqaralardıń biypárwalıǵı hám qáwipsizlik qaǵıydalarına ámel etpew jaǵdayları ushıraspaqta. Bizler bul puqaralardan órt qáwipsizligi qaǵıydalarına ámel etiwin sorap qalamız.
Adilbay Orazov,
Qaraqalpaqstan xabar agentligi sholıwshısı.