Jáhán densawlıqtı saqlaw shólkemi aldınǵı bildiriwinde dúnyada qus grippi virusı tez mutaciyaǵa ushırap, onıń tek ǵana qanatlı jániwarlar emes, al adamlarǵa da juǵıw qáwipi de joqarı ekeni haqqında eskertken edi.

Shólkemniń kúni keshe járiyalanǵan jańa esabatında atap ótiliwinshe, bıyılǵı jıldıń ótken dáwirinde H5N1 virusın juqtırıw menen baylanıslı 76 usınday jaǵday anıqlanǵan.
Nawqaslardıń kópshiligi awıl xojalıǵı tarawı xızmetkerleri bolsa, 61 i AQShta jasaytuǵın puqaralar bolıp tabıladı. Sonday-aq, bunday jaǵdaylar Avstraliya, Kanada, Qıtay, Kambodja hám Vetnamda da dizimge alınǵan.
H5N1 virusı házirgi shekem adamnan adamǵa juǵıw ushın beyimlespegen hám izertlewler dawamında usı sıyaqlı jaǵdaylar anıqlanbaǵan.
«Biraq virus mutaciyaǵa ushırawda dawam eter eken, jaǵday tez ózgeriwi múmkin hám buz bunday «scenariy»ge bárqulla tayar bolıwımız kerek», deydi – JDSShnıń juwapker wákili Mariya Van Kerxove.
Usı sebepten Jáhán densawlıqtı saqlaw shólkemi mámleketlerdi kesellik ústinen qadaǵalawdı kúsheytiw hám anıqlanǵan jaǵdaylar boyınsha imkaniyatı barınsha tezirek xabar beriwge shaqırdı.
Óz gezeginde, epidemiologlardıń atap ótiwinshe, adamlar infekciyadan zıyanlanǵan hám qaytıs bolǵan haywanlarǵa jaqınlaspawı kerek.

ÓzA