Sońǵı jıllarda elimizde eski qádiriyatlarımızdı, atap aytqanda, mártlik, batırlıq, watansúyiwshilik, jaqsı ideyalardı ózinde jámlegen milliy sport túri bolǵan gúresti ǵalaba en jaydırıw, rawajlandırıw hám dúnyaǵa tanıtıw, bul qádiriyatımızdı dúnya ǵáziynesine aylandırıw boyınsha bir qatar ilajlar ámelge asırılmaqta.
Sonıń menen birge, gúrestiń barǵan sayın keń tarqalıp atırǵanlıǵı abıraylı xalıqaralıq jarıslardı shólkemlestiriwge, infrastrukturasın hám materiallıq-texnikalıq bazasın modernizaciyalawǵa, sport inventarları hám kiyim támiynatın jaqsılawǵa, soǵan baylanıslı óndiristi keńeytiwge, taraw ushın maman kadrlar, trenerler hám arbitrlerdi tayarlawǵa itibar kúsheymekte. Ásirese, jaslardıń usı sport túri menen shuǵıllanıwı ushın zárúr sharayatlar jaratılmaqta.
Aldın xabar bergenimizdey, usı maqsette bıyılǵı jılı 16-18-dekabr kúnleri Nókis qalasındaǵı Olimpiada hám paralimpiya sport túrlerine tayarlaw orayında sporttıń belbewli gúres túri boyınsha ul balalar hám qızlar arasında Ózbekstan kubogi ushın jarıs bolıp ótti.
Jarısta Tashkent qalası hám wálayatlardan kelgen 2006-2007-jılları tuwılǵan 200 den aslam sportshılar 18 salmaq kategoriyasında óz-ara kúsh sınasıp, jeńimpazlıq ushın qızǵın bellesiwler alıp barıldı.
Qızǵın bellesiwlerge bay bolǵan jarıs juwmaǵına bola komandalıq esapta Qaraqalpaqstan Respublikası komandası 2 altın, 3 gúmis hám 15 bronza medalı menen birinshi, Tashkent wálayatı komandası ekinshi, Ándijan hám Namangan wálayatlarınıń komandaları úshinshi orındı iyeledi.
– Men Nókis rayonında jasayman. Bes jasımnan berli sporttıń gúres túri menen shuǵıllanıp kiyatırman. Nókis qalasındaǵı Olimpiada hám paralimpiya sport túrlerine tayarlaw orayında jarıslarǵa jaqsı tayarlıq kóriw ushın barlıq sharayatlar jaratılǵan. Bunnan aldın ótkerilgen kóplegen basqa jarıslarda da jeńimpazlar qatarınan orın alıp kiyatırǵan edim. Bul jarısqa 52 kilogramm salmaq kategoriyasında qatnasıp, birinshi orındı iyelewge miyasar boldım. Pursattan paydalanıp meni usı jarısqa tayarlaǵan trenerlerime minnetdarshılıq bildiremen,-deydi J.Shınbatırov.
Jeńimpazlar shólkemlestiriwshiler tárepinen tayarlanǵan diplom, medal hám bahalı sawǵalar menen sıylıqlandı.
Á.Jiyemuratov,
Qaraqalpaqstan xabar agentligi