Berdaq atındaǵı Qaraqalpaq mámleketlik universiteti Dene mádeniyatı fakulteti student-jasları arasında «Ayrıqsha jaǵdaylar: Puqaralardıń záhárli gaz iyisinen záhárleniwiniń aldın alıw» atamasında úgit-násiyatlaw ilajı ótkerildi
Ilajǵa fakultet basshıları, Qaraqalpaqstan Respublikası Ayrıqsha jaǵdaylar basqarması xızmetkerleri, tyutorlar hám ijarada jasawshı student-jaslar qatnastı.
Maqset – respublikamızda hawa rayınıń suwıtıwına hám máwsimlik ısıtıw qurılmalarına talaptıń artıwına baylanıslı studentlerdiń ayrıqsha jaǵdaylardıń aldın alıw qaǵıydalarına ámel etiwin támiyinlew hám olardıń záhárli gaz iyisinen záhárleniwiniń aldın alıw bolıp esaplanadı.
Ilajda bayanatshılar gúzgi-qısqı máwsimde júz beriwi múmkin bolǵan ayrıqsha jaǵdaylarıń kópshilik bólegi tiykarınan záhárli gaz iyisinen záhárleniw jaǵdayları menen baylanıslı ekenligi, záhárli gaz (SO) reńsiz, iyissiz záhárli birikpe bolıp, tábiyǵıy gaz, janılǵı, kómir, ottıń tolıq janbawı aqıbetinde payda bolatuǵınlıǵı, tútin quramında 3 procent, islengen gazde 13 procent, jarılıwshı gazlerdiń quramında 50−60 procentke shekem záhárli gaz iyisi bolatuǵınlıǵı tuwralı maǵlıwmatlar berildi. Úy sharayatında tábiyǵıy gaz shıǵıp turǵanda hám pech arqalı jılıtılatuǵın úylerde hám shomılıw xanalarında (banya) adam záhárleniwi múmkinligi mısallar menen atap ótildi.
– Sonday-aq, qoldan islengen kotyollar, gaz plitasınan úydi jılıtıw hám onıń ústinde kiyimlerdi keptiriw, plitanıń qadaǵalawsız jaǵılǵan halatta qalıwına jol qoymaw, bunnan tısqarı gaz shıǵıp atırǵanlıǵın shırpı shaǵıp tekserip kóriw múmkin emesligi ayrıqsha atap ótildi,-deydi Dene mádeniyatı fakulteti dekanınıń jaslar menen islesiӯ boyınsha orınbasarı R.Óteniyazov. – Bul ilaj ásirese, ijarada jasap atırǵan studentlerimiz ushın oǵada paydalı boldı.
Egerde gaz iyisi sezilse, ayna hám esiklerdi tezlik penen ashıw, kóshege shıǵıw hám 104 nomeri arqalı gaz xojalıǵı avariya-dispetcherlik xızmeti yaki 1050 nomeri boyınsha qutqarıw xızmetine qońıraw etiw zárúr ekenligi, bunday jaǵdaylarda jarıtqısh úskeneleri, ot jaǵıw, elektr úskenelerin iske qosıw múmkin emesligi qatań eskertildi.
Student-jaslar kórgizbege qoyılǵan órttiń aldın alıw hám saplastırıw boyınsha paydalanılatuǵın ásbap-úkeneler menen tanısıp, qánigelerden ózlerin qızıqtırǵan sorawlarǵa juwap aldı.
Qaraqalpaqstan xabar agentligi