Qanlıkól rayonı Mádeniyat mákan puqaralar jıyını aymaǵınan “Jaslar seyil orayı” nıń saltanatlı ashılıw máresimi bolıp ótti. Ashılıw saltanatında rayon hákimi B.Sultanov, sektor basshıları, tiyisli taraw wákilleri, rayon jasları, máhálle belsendileri, nuranıylar qatnasıp, dástúriy lentalar kesildi.

Rayon hákimi B.Sultanov shıǵıp sóylep, jaslar seyili orayın qurıp pitkergen qurılısshılarǵa óz minnetdarshılıǵın bildirdi.
Atap ótilgenindey, jaslar – jámiyetimizdiń háreketlendiriwshi kúshi, elimizdiń gúlleniwi hám abadanlıǵınıń tiykarı bolıp tabıladı. «Jaslar seyil orayı» rayon jasları ushın úlken imkaniyatlar maydanına aylanadı. Házirgi kúnde jaslarǵa jaratılıp atırǵan múmkinshilikler hám sharayatlar milletimizdiń aydın keleshegin támiyinlewde áhmiyetli.
Baslamalı byudjet tiykarında 1 milliard 207 million sumnan aslam qarjı esabınan qurıp pitkerilgen bul dem alıw ornı, xalqımız, ásirese, jaslarımız ushın tek ǵana dem alıw ornı emes, al jaslardıń óz ideyaların hám ármanların ámelge asıratuǵın, bilimlerin jetilistiretuǵın hám salamat turmıs tárizine shaqıratuǵın orayǵa aylanadı. Jaslar ushın arnalǵan bunday orınlardıń qurılıwı olardıń ruwxıy hám fizikalıq jetikligin támiyinlew jolındaǵı gezektegi qádemlerimizdiń biri, desek asıra aytpaǵan bolamız.
Bul orayda jaslar ushın birinshi gezekte seyil orayı, hár qıylı bayram ilajları, biypul Bookcafe, WiFi zona hám sawda xızmeti ushın sharayatlar jaratılǵan.
Oraydıń ashılıw saltanatında jas jubaylardıń rásmiy nekeden ótiw máresimi de ótkerildi.
Bunnan soń rayonlıq Watan tayanıshı otryadı shıǵıwları bayramǵa ózgeshe keypiyat baǵıshladı. Bul otryadlarǵa aǵza bolǵan oqıwshilardıń qatnasıwında, sport jarısları, áskeriy texnikalıq kórgizbeli shıǵıwlar ótkerildi.
Bayram ilajı estrada juldızlarınıń koncert baǵdarlaması menen dawam etti.

Á.Jiyemuratov,
Qaraqalpaqstan xabar agentligi