Nókis qalasında respublikamızdaǵı futbol mektebi hám sport mektepleriniń 2013-2014-jılları tuwılǵan tárbiyalanıwshıları arasında «10-dekabr-xalıqaralıq futbol kúni»ne arnalıp Qaraqalpaqstan Respublikası futbol mektebi birinshiligi jarısı bolıp ótti.
Jas futbolshılardıń sheberligi hám tájiriybesin arttırıwǵa xızmet etetuǵın jarıs oǵada qızıqlı bolıp ótti.
Keskin ótken oyınlar juwmaǵında, barlıq qarsılasların jeńip shıqqan Kegeyli rayonı sport mektebi tárbiyalanıwshıları birinshi orındı iyelewge miyasar boldı.
Al, ekinshi hám úshinshi orınlar bolsa, maydan iyeleri esaplanǵan QQRFM-3 hám QQRFM-2 komandalarına nesip etti.
Sonday-aq, turnirde «Eń jaqsı oyınshı» hám «Eń jaqsı dárwazaman» nominaciyaları boyınsha da jeńimpazlar anıqlanıp, olarǵa shólkemlestiriwshiler tárepinen arnawlı sıylıqlar tapsırıldı.
Jarıs juwmaǵında, jeńimpaz komandalar diplom, medal hám estelik sawǵalar menen sıylıqlandı.

Adilbay Orazov,
Qaraqalpaqstan xabar agentligi sholıwshısı.