Búgin Qaraqalpaqstan Respublikasınıń mámleketlik bayraǵı qabıl etilgenine 32 jıl toldı. 1992-jıl 14-dekabr kúni Qaraqalpaqstan Respublikası Joqarǵı Keńesiniń XI sessiyasında «Qaraqalpaqstan Respublikasınıń mámleketlik bayraǵı haqqında»ǵı Nızam qabıl etildi.
Qaraqalpaqstan Respublikasınıń mámleketlik bayraǵı Qaraqalpaqstan Respublikasınıń suverenli mámleket ekenliginiń nıshanı esaplanadı.
Qaraqalpaqstan Respublikasınıń mámleketlik bayraǵı aspan kók, toyǵın sarı hám jasıl reńlerden ibarat bolıp, ortasındaǵı sarı reńli bólek aq hám qızıl sızıqlar arqalı ajıralıp turadı.
Bayraqtıń aspan kók reńi báhár jasıllıǵı hám ómir dáregi – suwdıń máńgi tımsalı bolıp esaplanadı.
Sarı reń bolsa Qaraqalpaqstan aymaǵınıń úlken bóleginiń sahradan ibarat ekenligin ańlatadı.
Jasıl reń bolsa tábiyattıń jańalanıwı, ruwxıy jasarıw, isenim hám quwanıshtıń nıshanı.
Bayraqtaǵı jańa tuwılǵan ay musılmanlardıń muqqaddes tımsalı bolsa, bes juldızdıń súwreti Qaraqalpaqstannıń áyyemgi hám náwqıran bes qalasınıń – qaraqalpaqstanlılardıń turmıs hám isenim qorǵanlarınıń tımsalı bolıp tabıladı.
Qaraqalpaqstan Respublikasınıń mámleketlik bayraǵı Qaraqalpaqstan Respublikasınıń rásmiy wákilleriniń sırt elge saparlarında, xalıqaralıq ánjumanlarda, kórgizbelerde hám sport oyınları jarıslarında respublikamızdı dúnyaǵa tanıtadı. Qaraqalpaqstan Respublikasınıń mámleketlik bayraǵı xalıqaralıq maydanda basqa mámleketlerdiń bayraqları menen teń jelbirep turadı.
Respublikamız puqaraları hám bul jerde jasaytuǵın basqa adamlar Qaraqalpaqstan Respublikasınıń mámleketlik bayraǵın húrmetlewi shárt.
Qaraqalpaqstan Respublikası mámleketlik bayraǵı qabıl etilgeniniń 32 jıllıq bayramı menen gúllán xalqımızdı Qaraqalpaqstan xabar agentligi atınan qutlıqlaymız. Bayram hámmege qutlı mubárek bolsın!

Qaraqalpaqstan xabar agentligi