Prezident Shavkat Mirziyoevtiń basshılıǵında 13-dekabr kúni sociallıq qorǵaw tarawındaǵı jumıslardıń nátiyjeliligin hám 2025-jıl ushın áhmiyetli wazıypalardı dodalaw boyınsha videoselektor májilisi bolıp ótti.
Ózbekstan – sociallıq mámleket. Konstituciyamızda bekkemlengen usı princip tiykarında mehir hám járdem sisteması xalıqqa jaqınlastırılmaqta. Barlıq aymaqlarda «Insan» orayları ashılıp, 102 sociallıq xızmet máhállelerde jolǵa qoyıldı. Sociallıq xızmetkerler úyme-úy júrip, usı jılı reestrde bolmaǵan jáne 95 mıń mútáj adamǵa járdem kórsetti. 51 mıń adamǵa mayıplıq belgilendi. 26 mıńı protez aldı. Jatıp qalǵan 4 mıń jalǵız kekse anıqlanıp, olarǵa úyiniń ózinde tárbiyalaw shólkemlestirildi. Mayıplıǵı bar 5 mıń bala baqsha-mektepke jaylastı.
Bunday mánzilli jumıslar sebepli xalıq qabıllawxanalarında hám hákimliklerde sociallıq qorǵaw hám járdem boyınsha múrájatler 35 procentke azayǵan.
Úsh ay aldın wálayat hám rayondaǵı 14 mıń basshı 75 mıń kámbaǵal shańaraqqa biriktirilip, olar menen individual islesiw jolǵa qoyıldı. Nátiyjede bul shańaraqlardaǵı 17 mıń adam turaqlı jumısqa jaylastırıldı, isbilermenlik hám qıytaq jer arqalı 14 mıń xalıqtıń dáramatı arttırıldı. 30 mıń bala baqsha, dógerek hám kásipke oqıtıw menen qamtıp alındı, 45 mıń mútáj xalıqqa medicinalıq járdem kórsetildi.
Biraq ayırım orınlarda jumıs durıs shólkemlestirilmegen jaǵdaylarda da bar. Mısalı, 184 basshı ózi juwapker bolǵan kámbaǵal shańaraqtıń úyine birde bir márte barmaǵan. Mayıplıǵı bar shaxslardıń bántligi dárejesi respublikada 20 procentke jetkeni menen, Jalaqudıq, Shımbay, Pastdarǵom, Chortoq hám Denaw rayonlarında bul kórsetkish ádewir az. Kelesi jılı Investiciya baǵdarlamasına kiretuǵın 598 sociallıq mákemeniń joybarı mayıplıǵı bar adamlarǵa beyimlesip islep shıǵılmaǵan.
Májiliste usı sıyaqlı kemshilikler kórsetip ótilip, gezektegi ilajlar dodalandı. Mámleketimiz basshısı sociallıq qorǵaw sistemasın kúsheytiwge baylanıslı jańa baslamalardı ayttı.
Kelesi jılı 1 million 200 mıń xalıqtı kámbaǵallıqtan shıǵarıw ushın bilimlendiriw, dógerek, kásip-óner, medicina mákemelerin sheshiw hám jasaw sharayatın jaqsılaw zárúrligi atap ótildi.
Bul baǵdarda jaqsı tájiriybeler bar. Mısalı, Taylaq hám Kasansay rayonlarında «Dáslepki rawajlanıw orayları» ashılıp, kámbaǵal shańaraqtaǵı hám mayıplıǵı bar bolǵan 4 mıń 200 balaǵa baqsha bilimlendiriwi berilgen. Wálayat hákimlerine bul tájiriybeni úyrenip, hár bir rayonda engiziw tapsırıldı.
Sonday-aq, kelesi jılı kámbaǵallıq joqarı mıń máhállede jáne birewden shańaraqlıq baqsha jumısı iske qosıladı. Jańa jıldan shańaraqlıq baqsha orınlarınıń 15 procentine kámbaǵal shańaraqtıń perzentleri qabıl etiledi hám baqsha tóleminiń bir bólegi qaplap beriledi.
Kámbaǵal shańaraq perzentleriniń oqıp, turmısın ońlawı ushın qosımsha hám imkaniyatlar jaratıladı. Sonıń ishinde, 18 mıń jaslar shet tili, málimleme texnologiyaları hám kásip ónerge oqıtıladı. Bul dógereklerdiń qárejetleri 80 procentke shekem byudjetten qaplanadı. 2025-jılı 3,5 mıń usınday perzentler joqarı bilimlendiriwge grant tiykarında qabıl etiledi.
Kámbaǵal shańaraqlardaǵı ózi háreketlene almaytuǵın 23 mıń adamǵa ata-anası, ómirlik joldası yaki balaları qarap otır. Yanvardan baslap olardıń 19 mıńına úyinde hám 4 mıńına kúndizgi qatnaw tiykarında qaraw jolǵa qoyıladı. Nátiyjede usı arqalı bánt bolǵan 15 mıń xalıqtıń qolı bosap, jumıs islewi múmkin boladı. Bunday xızmetti kórsetken jeke menshik sektorǵa shańaraq qárejetiniń 80 procentin mámleket tólep beredi. Bul tájiriybe aldın Tashkent qalasında, wálayatlarda jıl aqırına shekem jolǵa qoyıladı.
Kámbaǵal shańaraqtaǵı 460 mıń adam medicinalıq járdemge, 6 mıń shańaraq bolsa turaq jay sharayatın jaqsılawǵa mútáj. Sonıń ushın kelesi jılı mútáj adamlardıń xirurgiyalıq operaciyası ushın Medicinalıq qamsızlandırıw qorına qosımsha 185 milliard sum ajıratıladı. «Sociallıq dápterler» qarjısı bolsa kámbaǵal shańaraqlardıń jasaw sharayatın jaqsılaw hám dáramatın arttırıwǵa jumsaladı.