Jańalanǵan Konstituciyaǵa tiykarlanıp hákimlerdiń xalıq deputatları jergilikli keńeslerine basshılıq etiw ámeliyatı basqıshpa-basqısh biykar etilmekte. Bul norma usı jıldan baslap wálayatlar hám Tashkent qalalıq keńeslerine, 2026-jıldan bolsa rayonlıq, qalalıq keńeslerine qollanıladı.
Usı jılı wálayatlar hám Tashkent qalalıq keńesleriniń birinshi shólkemlestiriw sessiyalarında deputatlar arasında birinshi márte keńes baslıqları saylap alındı.
Oliy Majlis Senatında xalıq deputatları wálayatlar hám Tashkent qalalıq keńesleri baslıqları hám sekretariat baslıqları ushın keńesler jumısınıń rawajlanıwı, jergilikli atqarıw hám wákillikli hákimiyattıń bóliniwi principi boyınsha konstituciyalıq normalardıń engiziliwi hám tarawǵa baylanıslı reformalar boyınsha seminar shólkemlestirildi.
Ilajda Senat Baslıǵı T.Norboeva Prezidentimizdiń basshılıǵında mámleketimizde barlıq tarawlarda ámelge asırılıp atırǵan reformalar sıyaqlı jergilikli keńeslerdiń jámiyetlik turmıstaǵı ornın arttırıwǵa qaratılǵan sistemalı jumıslar alıp barılıp atırǵanın atap ótti.
Deputatlardıń jergilikli atqarıw uyımları menen nátiyjeli qarım-qatnasın jolǵa qoyıw, olardıń aymaqlardı sociallıq-ekonomikalıq rawajlandırıw hám xalıqtıń máplerin qorǵawdaǵı roli kúsheytilmekte.
Sonıń menen birge, parlament palatalarınıń májilislerinde mámleketimiz basshısı belgilep bergen tiykarǵı wazıypalarǵa hám bul baǵdarda wákillikli uyımlardıń roline toqtap ótildi.
Jergilikli keńesler hám deputatlardıń jumısın nátiyjeli shólkemlestiriw, saylawshılar menen islesiw, xalıqtıń mashqalaların úyreniw hám sheshiwde «máhálle jetiligi» hám puqaralıq jámiyetiniń basqa institutları menen nátiyjeli birge islesiwdi jolǵa qoyıw máselelerine itibar qaratıldı.
Seminarda jergilikli byudjetlerdi qáliplestiriw hám olardıń orınlanıwın qadaǵalaw, nızamlardıń oranlanıwın támiyinlew hám aymaqlıq baǵdarlamalardıń orınlanıwın qadaǵalaw, atqarıw hákimiyatı uyımları basshılarınıń esabat hám málimlemelerin tıńlawdıń tásirsheń mexanizmlerin qollanıw máselelerine itibar berildi.
Atap ótilgenindey, házirgi kúnde jergilikli mámleketlik hákimiyat uyımlarınıń jumısı «Kúshli keńes, esap beriwshi hám intaker hákim» principi tiykarında dúzilmekte. Bul qatnas jergilikli keńeslerdiń belsendiligin arttırıwǵa, aymaqtaǵı mashqalalardı sheshiwde intakerlikti qollap-quwatlawǵa qaratılǵan.
Seminarda Senat komitetleri, Senat apparatınıń quramlıq bólimleri, ministrlik hám uyımlardıń wákilleri jergilikli keńesler hám olardıń uyımlarınıń jumıs nátiyjeliligin arttırıw, qararlar qabıl etiwde ashıq-aydınlıqtı, nızamlılıqtı támiyinlew, sonday-aq, keń jámiyetshiliktiń pikirin inabatqa alıw máselelerine ayrıqsha itibar qarattı.
N.Abduraimova,
ÓzA