Bıyıl Berdaq atındaǵı Qaraqalpaq mámleketlik universitetiniń rektorı A.Reymov “ACVA POWER WIND KARATAU” juwapkershiligi sheklengen sırt el kárxanasınıń baslıǵı Soumendra Rout hám “SYNOHYDRO TASHKENT” juwapkershiligi sheklengen sırt el kárxanasınıń baslıǵı Shin Xang arasında birge islesiw boyınsha xojalıq shártnaması dúzilgen edi.
Xojalıq shártnaması sheńberinde ámelge asırılǵan jumıslardıń nátiyjeleri boyınsha berilgen texnikalıq tapsırmalardı orınlaw maqsetinde Arxeologiya kafedrasınıń docentleri S.Saypov hám A.Álimbetovlar Qaraózek rayonındaǵı Qoybaq APJ aymaǵındaǵı Nókis-1, 100 MV quwatlılıqa iye bolǵan samal elektr ótkeriw liniyası hám samal elektrostanciyasınıń qurılıs jumısları alıp barılıp atırǵan jerdegi qazılǵan orınlarda úyreniw jumısların alıp bardı.
Baqlaw-úyreniw jumısları waqtında hár biriniń quwatlılıǵı 6,5 MV bolǵan 16 samal turbina generatorlarınıń qurılısı, elektr uzatıw liniyası, qurılıs aymaǵındaǵı jataq jaydıń qurılısı, texnikalık qáwipsizlik, jumıs islewshilerge xızmet kórsetiw orınlarınıń qurılıs jumısları kózden ótkerildi.
Sonday-aq, baqlaw jumısları dawamında qurılısshılarǵa tariyxıy estelikler, arxeologiyalıq obyektler hám materiallar menen islesiw, mádeniy qatlamlardıń ózgeshelikleri, arxeologiyalıq esteliklerdiń túrleri, arxeologiyalıq qurılıslar, qorǵan qalalar, qonıslar, qalashalar, mákan orınlar, awıllar, qoyımshılıqlar, tóbeshikler, taw-taslardaǵı súwretler, petroglifler, taw kánleri hám ustaxanalar, sıyınıw orınları, arxeologiyalıq tabılmalar, gidrotexnikalıq qurılıslar haqqında kórgizbe qurallardan paydalanılıp túsindiriw jumısları alıp barıldı.
Eger usınday arxeologiyalıq materiallar tabılsa, bul jerde arxeologiyalıq ilimiy-izertlew jumısların alıp barıw zárúrligi boyınsha kórsetpeler berildi.
Universitettiń Arxeologiya kafedrasınıń arxeologları respublikamızda aldaǵı waqıtları da alıp barılatuǵın usınday úlken qurılıs jumıslarında birge islesiw boyınsha kelisip alındı.
Qaraqalpaqstan xabar agentligi