«Ózbekstan Respublikasınıń mámleketlik gimni haqqında»ǵı Nızam 1992-jıl 10-dekabrde qabıl etildi. Bıyıl Ózbekstan Respublikası mámleketlik gimniniń qabıl etilgenine 32 jıl toldı. Bayram ilajları elimizdiń barlıq orınlarında kóterińki ruwxta belgilenbekte.

Sáne múnásibeti menen Ózbekstan mámleketlik kórkem óner hám mádeniyat institutı Nókis filialında bayram ilajı bolıp ótti. Ilaj Ózbekstan hám Qaraqalpaqstan Respublikalarınıń mámleketlik gimnleri menen baslandı.
Filial direktorı A.Ayapov, «Xalıq dóretiwshiligi» fakulteti dekanı Q.Turdiev hám basqalar shıǵıp sóylep, mámleketlik nıshanlar, sonıń ishinde, gimnniń áhmiyetine ayrıqsha toqtap ótti.
Atap ótilgenindey, hár bir mámlekettiń bayraǵı, gerbi, gimni – sol mámleket suverenitetiniń tımsalı bolıp esaplanadı. Usı mámleketlik nıshanlar arqalı biz ózligimizdi ańlaymız, erteńgi kúnge bolǵan isenimimizdi bekkemleymiz. Xalqımızdıń ótmishin, milliy dástúrlerin, qádiriyatların, tınıshlıq hám milletler aralıq tatıwlıq sıyaqlı pazıyletlerdi ózinde jámlegen gimn ózligimizdi maqtanısh etiwde, jaslardı Watansúyiwshilik ruwxında tárbiyalawda, sonday-aq, olardıń hár tárepleme jetik insanlar bolıp jetilisiwinde tárbiyalıq áhmiyetke iye qural sıpatında xızmet etip kelmekte. Sonday-aq, mámleketlik gimn elimiz delegaciyalarınıń sırt ellerge saparı waqtında, xalıqaralıq maydanlardaǵı túrli ilajlarda, sport jarıslarında elimizdiń tımsalı sıpatında jańlap kelmekte.

Qaraqalpaqstan xabar agentligi