Orınlarda xalıqtıń abadanlıǵın arttırıw, alıs elatlı punktlerdiń infrastrukturasın jaqsılaw baǵdarındaǵı jumıslar nátiyjeli dawam etpekte. Sonıń ishinde, jańa ishimlik suwı liniyasın tartıw jumısları da jaqsı jolǵa qoyılmaqta.

Aldın xabar bergenimizdey, 2024-jıl 29-oktyabr kúni Moynaqqa jańa ishimlik suwı liniyasın tartıw jumıslarına start berilgen edi. Jańa suw liniyası 5 mıń kub metr suw jetkeriw hám 1300 den zıyat xojalıqtı taza ishimlik suwı menen támiyinlew imkaniyatına iye.
Joybar Aziya rawajlandırıw banki esabınan qarjılandırılıp, joybar bahası 8,21 million dollardı quraydı.
Joybar tiykarında Moynaq rayonındaǵı Qızıljar APJnıń «Áliy» awılı, Hákim ata APJnıń «Doslıq» awılı, Mádeli APJnıń «Shege» awılı, Bozataw APJnıń «Ámiwdárya», «Qıpshaqdárya», «Tallıq» awılları, Úshsay APJnıń «Úshsay», «Toqpaq ata» awıllarına hám rayon orayındaǵı mákan puqaralar jıyınları aymaqlarına «Túye moyın» suw saqlaǵıshınan ishimlik suwı jetip baradı.
Házirgi jumıslar Bozataw APJnıń «Tallıq» awılında alıp barılmaqta.
– Mine búgin awılımız benen úlken quwanıshqa bólenip atırmız. Sebebi, awıldaǵı suw máselesi kóp waqıttan berli sheshilmey kiyatırǵan mashqalalardıń biri edi. Hár jerden qazılǵan baspa kranlardan suw alıp iship otır edik. Endi awılımızǵa kran tartıp atırıptı. Prezidentimizden, Joqarǵı Keńes hám rayon basshılarınan bul ushın minnetdarmız. Endi awıl turǵınları ishimlik suw máselesinen qıynalmaydı degen úmittemiz,-deydi awıl turǵını Aliy Bekberdiev.
Jańa ishimlik suwı liniyaların tartıw jumısları qızǵın dawam etpekte.

Á.Jiyemuratov,
Qaraqalpaqstan xabar agentligi.