Prezident Shavkat Mirziyoev 6-dekabr kúni «Tashkent – Xojakent» jónelisinde jańa elektropoezddı kózden ótkerdi.
Mámleketimiz basshısınıń ótken jıl 10-oktyabrdegi qararına muwapıq, «Ózbekstan temir jolları» akcionerlik jámiyeti transformaciyalanbaqta. Jámiyet quramında infrastruktura, vagon xızmeti, jolawshı tasıw sıyaqlılar menen shuǵıllanıwshı 6 erkin kárxana jumıs basladı.
Poezdlar parki de keńeytilmekte. Ásirese, jolawshı tasıwda xalıq hám turistlerge qolaylıqlar arttırılmaqta. Jańa poezdlar alıp kelindi. Tashkentten Samarqand, Buxara, Qarshı sıyaqlı tariyxıy qalalarımızǵa «Afrosiyob» elektropoezdlarınıń qatnawları kóbeytildi.
Ótken dáwirde elimizde 3 mıń kilometrden aslam temir jollar elektrlestirildi. Buxara- Urgensh –Xiywa temir jol tarmaqların elektrlestiriw juwmaqlawshı basqıshta. Miskin –Nókis jónelisinde jedel dawam ettirilmekte. Tashkent átirapında da elektrlesken jol qurılıp, poezdlardı ótkeriw imkaniyatı 30 procentke arttı.
Endi «Tashkent- Xojakent» jónelisinde jańa elektropoezd qatnawǵa qoyılmaqta. Mámleketimiz basshısı bul poezdǵa shıǵıp, háreketleniwin hám qolaylıqların kórdi.
Vagonlar ıqsham hám jaqtı, jolawshılar ushın qolaylı. Orınlıqlar sanı 586. Maǵlıwmat tabloları hám órt qáwipsizligi sisteması ornatılǵan. Poezd saatına 120 kilometrge shekem tezlikke shıǵa aladı. Hár bir tárepke kúnine úshewden qatnaw jolǵa qoyıladı .Sapar dawamında mámleketimiz basshısı temir jol infrastrukturasın rawajlandırıw, jolawshılar ushın sharayatlardı jaqsılaw, temir jollardı elektrlestiriw hám olarǵa baylanısqan aymaqlardı abadanlastırıw boyınsha juwapkerlerdiń esabatların tıńladı.
Tashkent hám Xojakent aralıǵındaǵı temir jolǵa baylanısqan maydanlardı 2025-jıldıń renovaciya baǵdarlamasına kirgizip, olardı tártipke keltiriwge kórsetpe berildi. Jónelistiń qıysıq bóleklerin tuwrılap qayta qurıw arqalı kúnlik ekspress poezdlardıń qatnawın kóbeytiw hám kóbirek jolawshılarǵa xızmet kórsetiw ushın sharayat jaratıw tapsırıldı.
«Jasıl mákan» joybarı sheńberindegi jumıslar da dodalandı. Temir joldıń shetlerin kóklemzarlastırıw, suw resursları sheklengen aymaqlarda sırt el tájiriybesi tiykarında qurǵaqshılıqqa shıdamlı ósimliklerdi egiw, sırt elden tek ǵana jergilikli klimatımızǵa beyimlesken nállerdi alıp keliw kerek ekenligi atap ótildi.
ÓzA