Búgingi kúnde dúnya xalqınıń úshten bir bólegin jaslar quraydı. Al, Ózbekstanda jasawshı xalıqtıń 18 millionnan aslamın jas awlad wákilleri quraydı.

Búgingi kúnde mámleketimizde bilimli jaslardı qollap-quwatlaw boyınsha bir qatar ilajlar alıp barılmaqta. Sonıń ishinde, jaslardıń bántligin támiyinlew baslı wazıypa etip belgilengen.

Taqıyatas rayonında da jaslardıń bántligin támiyinlew maqsetinde kóplegen ilajlar ámelge asırılmaqta.
– Rayonımızda jámi 14 máhálle bolıp, bántligi támiyinlegen jaslardıń sanı 466 mıńdı quraydı. Solardan 101 jas turaqlı jumıs orınlarına jaylastırılǵan, 96 jas kásip-óner hám zamanagóy kásiplerge oqıtılmaqta, 46 jas subsidiya tiykarında ásbap-úskene ajıratıw arqalı hám 70 jasqa awıl xojalıǵında 56 gektarlıq jer maydanı ajıratılıp bántligi támiyinlengen,-deydi Taqıyatas rayonlıq Jaslar isleri bóliminiń bas qánigesi E.Xalmuratov. – Sonıń menen birge, isbilermenlik penen shuǵıllanıwı ushın 145 jasqa kredit ajıratılıp, 5 jas áskeriy xızmetke jiberilgen.
Jaslarǵa jaratılǵan bunday sharayatlar olardıń turmıstan óz ornın tabıwına, kámil insan bolıp jetilisiwine úlken imkaniyat jaratadı, álbette. Rayonda bul baǵdardaǵı ilajlar nátiyjeli dawam etpekte.

X.Tursınǵalieva, A.Nuratdinova,
QMU Jurnalistika tálim baǵdarınıń 4-kurs studentleri.
Qaraqalpaqstan xabar agentligi.