Toshkentning “Humo” xokkey klubi Qozog‘iston muntazam chempionati doirasidagi navbatdagi o‘yinini “Aktobe” jamoasiga qarshi o‘tkazdi. Mazkur jamoalar o‘rtasidagi ikki uchrashuv “Humo arena” majmuasida bo‘lib o‘tdi.
“Humo” ilk o‘yinda 2:4 hisobida yutqazib qo‘ygan bo‘lsa, ikkinchi bahsda 3:2 hisobida zafar quchib, mag‘lubiyat alamini oldi. Qayd etilgan ushbu natijalardan so‘ng poytaxtimiz jamoasi 18 o‘yinda 23 ochko bilan 5-pog‘onaga ko‘tarilgan bo‘lsa, “Aktobe” 16 o‘yinda 16 ochko bilan 9-o‘rinda qoldi.
Endi “Humo” xokkey klubi 27-28 noyabr kunlari “Humo arena”da musobaqa peshqadami “Torpedo” jamoasi bilan o‘yin o‘tkazadi. Uchrashuvlar mahalliy vaqt bilan soat 19:30 da boshlanadi.
Javohir Toshxo‘jayev,
O‘zA