Iordaniyaning Amman shahrida boks bo‘yicha o‘smirlar va kichik o‘smirlar o‘rtasidagi Osiyo chempionatida chorak final bahslari boshlandi. Chorak final bosqichining bugungi kichik o‘smirlar o‘rtasidagi bellashuvlarida O‘zbekiston terma jamoasining 6 nafar charm qo‘lqop ustalari ringga ko‘tariladi.

Unda vazni -35 kg. bo‘lgan Sarmat Shokarimov qozog‘istonlik Daulet Tenelbayni sinovdan o‘tkazsa, -37 kg. vazndagi bokschimiz Muhriddin Hamidjonov filippinlik Richard Paylaga qarshi jang qiladi. Shuningdek, Kamronbek Komilov (-40 kg.) – Atabek Hojiyev (Turkmaniston), Sabinaxon Kamiljonova (-37 kg.) – Pei-Yun Chiang (Xitoy Taypeyi), Oybek Alimjonov (-46 kg.) – Sultan Shannaq (Iordaniya), Rayhona Alimxanova (-43 kg.) – Xiao-Ting Shao (Xitoy Taypeyi) o‘rtasidagi bellashuvlarga guvoh bo‘lamiz.

Eslatib o‘tamiz, kechagi janglarda -60 kg. vaznda Abrorbek Sharipov tailandlik Santi Kayevboonraungni taslim etgan bo‘lsa, Sunnatbek Ilhomov -66 kg. vazn toifasida yaponiyalik Kunimitsu Honjoga imkoniyatni boy berib qo‘ydi.

Javohir Toshxo‘jayev, O‘zA