Futbol bo‘yicha Yevropa ligasining 1/8 finali doirasidagi barcha uchrashuvlar yakunlandi. Mazkur bosqichning eng qiziqarli va biz uchun ahamiyatli bo‘lgan bahsi albatta, “Roma” va “Atletik Bilbao” uchrashuvi bo‘ldi. Ushbu o‘yinda o‘zbek o‘g‘loni Eldor Shomurodov “Roma” tarkibida o‘zini yana bir bor ko‘rsatdi.

Ushbu jamoalar o‘rtasidagi uchrashuv Rim shahridagi “Olimpiko” stadionida bo‘lib o‘tdi. O‘yinda hisob 50-daqiqada mehmonlar tomonidan ochilgan bo‘lsa, 56-daqiqada Anxelino hisobni tenglashtirdi. “Roma” bosh murabbiyi Klaudio Raneri 71-daqiqada Eldor Shomurodovni zaxiradan maydonga tushirdi. Eldor kutilganidek o‘zining ajoyib texnikasi va tezkorligi bilan o‘yin tizginini o‘z qoliga oldi. Buning natijasida 90+3-daqiqada gol urib, jamoasiga g‘alaba keltirdi. Shu tariqa, “Roma” o‘z maydonida “Atletik”ni 2:1 hisobida taslim etdi.

Eldor Shomurodovning ushbu uchrashuvdagi o‘yiniga dunyoning mashhur tahliliy portallari quyidagi ballarni qo‘ydi: “SofaScore” 7.2, “FlashScore” 7.3, “Futmob” 6.9 va “WhoScored?” tomonidan ham 6.9 ballga loyiq ko‘rildi.

Ushbu uchrashuvdan so‘ng, “Roma” bosh murabbiyi Klaudio Raneri uchrashuv qahramoni Eldor Shomurodov haqida o‘z fikrlarini bildirib o‘tdi.

– Oldindan hech narsa deb bo‘lmaydi. “Atletik” bilan bo‘lgan bahsda Eldor Shomurodov ilk daqiqalardan o‘ynaganida balki umuman gol urolmagan bo‘lardi. Balki hamma kiritilgan to‘plar muallifiga aylanardi. Shunday bo‘ladi, deb kim oldindan aytib bera oladi? Sabr-toqat bilan hamma narsaga erishish mumkin. Eldor Shomurodov gol urgan vaziyatda hamma o‘yindan tashqari holatni qidirdi. Lekin biz zaxira o‘rindig‘ida o‘tirib, bunday emasligini ko‘rib, bilib turgan edik, — dedi Klaudio Raneri.

Eldor Shomurodovning “Roma” tarkibida ko‘rsatayotgan o‘yini dunyo futbol mutaxassislari tomonidan munosib e’tirof etilmoqda.

Endi esa Yevropa ligasining 1/8 finalida qayd etilgan boshqa natijalar bilan tanishtirib o‘tamiz. “Az Alkmar” o‘z maydonida “Tottenxem” ustidan 1:0 hisobida zafar quchgan bo‘lsa, “Manchester Yunayted” safarda “Real Sosedad” bilan durang o‘ynadi — 1:1. “Viktoriya” va “Latsio” bahsi 1:2 hisobida yakunlandi. “Ayntraxt” esa 2:1 hisobida “Ayaks”ni taslim eta oldi. Shuningdek, “Fenerbaxche” – “Reyndjers” 1:3, “FKSB” – “Olimpik Lion” 1:3, “Budyo-Glimt” – “Olimpiakos” 3:0 hisoblari qayd etildi.

Javohir Toshxo‘jayev,

O‘zA