Ayni paytda Oliy Majlis Qonunchilik palatasining navbatdagi majlisi bo‘lib o‘tmoqda. Unda deputatlar Vazirlar Mahkamasining “O‘zbekiston – 2030” strategiyasini “Yoshlar va biznesni qo‘llab-quvvatlash yili”da amalga oshirishga oid Davlat dasturining 2024 yil yakunlari ijrosi yuzasidan hisobotini ko‘rib chiqmoqda.

Majlisda iqtisodiyot va moliya vaziri Jamshid Qo‘chqorov axborot bermoqda.

– Davlat dasturidagi ustuvor yo‘nalishlar va maqsadlarning o‘z vaqtida sifatli bajarilishini ta’minlash maqsadida barcha zarur choralar ko‘rilgan. 2024 yil yakunida yalpi ichki mahsulot o‘tgan yilga nisbatan 6,5 foizga oshib, 115 mlrd. dollarga yetdi. Davlat byudjeti daromadlari 274,4 trillion so‘mga yetib, 18,4 foizga ko‘paydi. Yillik inflyatsiya darajasi 9,8 foizni tashkil etdi.

Xorijiy investitsiyalar hajmi avvalgi yilga nisbatan qariyb 1,6 foizga ko‘payishiga erishildi. Eksport ilk bor 27 milliard dollarga yetdi. Tog‘-kon, neft-gaz, kimyo, qishloq xo‘jaligi sohalarida investitsiyalar hajmi ikki barobar ko‘paydi.

Aholi bandligini ta’minlash, daromadlarini oshirish bo‘yicha amalga oshirilgan ishlar o‘z samarasini bermoqda. Bu boradagi ishlar o‘laroq, kambag‘allik darajasi 2023 yildagi 11 foizdan 2024 yilda 8,9 foizga qisqarishiga sharoit yaratildi, – dedi J.Qo‘chqorov.

Davlat byudjeti ijrosi yuzasidan hisobot eshituvi davom etmoqda.

Muhtarama Komilova, O‘zA