Bugun, 8 yanvar kuni Avstraliyaning Kvinslend shahrida o‘tkaziladigan professional boks oqshomida hamyurtimiz Bahodir Jalolov bilan “Parij-2024” Olimpiadasi chorak finalida to‘qnash kelgan Teremoana Junior germaniyalik Osasu Otobo bilan navbatdagi jangda ringga ko‘tariladi.
Mazkur jangga tayyorgarlik ko‘rish jarayonidagi tadbirlardan birida avstraliyalik bokschi Teremoana Junior Bahodir Jalolov bilan revansh jangini o‘tkazish niyati borligini bildirgan.
U jurnalistlarga intervyu berish jarayonida Bahodirdan Olimpiada uchun qasos olish istagi borligini, ular albatta professional boksda to‘qnash kelishi kerakligini, bu kunni intiqlik bilan kutayotganini bildirgan.
Aytish lozim, ikki karra Olimpiya o‘yinlari va ikki karra jahon chempionligiga erishgan yengilmas bokschimiz Bahodir Jalolov 2024 yilgi Parij Olimpiadasining chorak finalida Teremoanani hakamlarning yakdil qarori bilan 5:0 hisobida mag‘lub etgan edi.
Eslatib o‘tamiz, professional boksda 14 ta jang o‘tkazib, barchasida raqiblarini mag‘lub etgan Bahodir Jalolov navbatdagi jangida Fransiya vakili David Spilmont bilan ro‘baro‘ keladi. Ushbu jang 6 fevral kuni Kanadaning Monreal shahrida bo‘lib o‘tadi.
T.Ro‘ziyev, O‘zA