Rossiyaning Moskva shahrida sinxron suzish bo‘yicha o‘tkazilayotgan Federatsiya kubogi musobaqasining ikkinchi kuni ham sportchilarimiz uchun muvaffaqiyatli o‘tdi.
Jumladan, katta yosh toifasida tashkil etilgan miks duet bahslarida Vyacheslav Rudnev va Anna Vaenko navbatdagi kumush medal bilan taqdirlandi. Ayollar orasidagi solo bellashuvlarida esa A.Vaenko 154.5187 ball jamg‘arib, delegatsiyamiz hisobiga yana bir kumush medalni keltirgan bo‘lsa, Sabina Mahmudova o‘smirlar o‘rtasidagi yakka mashq bajarishda shohsupaning ikkinchi pog‘onasidan joy oldi.
Ma’lumot o‘rnida: Nufuzli musobaqaning ikkinchi kuni yakunlariga ko‘ra delegatsiyamiz hisobidagi medallar 5 ta kumush va 1 bronza, jami 6 tani tashkil etadi.
Javohir Toshxo‘jayev,
O‘zA