Futbol bo‘yicha Yevropa chempionlar ligasining 6-tur uchrashuvlari bo‘lib o‘tmoqda. Birinchi kungi bahslarda favorit deya e’tirof etilayotgan jamoalar ishonchli tarzda g‘alaba qozondi.

Bu turda kutilganidek, musobaqa peshqadami “Liverpul” safarda “Jirona”ga qarshi o‘yinda minimal hisobda g‘alaba qozondi. Ushbu uchrashuvdagi yagona gol Muhammad Saloh tomonidan 63-daqiqada penaltidan kiritildi. Shu tariqa, “Liverpul” turnir jadvalida 18 ochko to‘plagan holda peshqadamlikni mustahkamlab oldi.

Joriy yilgi Yevropa chempionlar ligasida muvaffaqiyatsiz ishtirok etayotgan Madridning “Real” jamoasi Bergamo shahrida mezbon jamoa “Atalanta”ni 3:2 hisobida mag‘lub etdi va muhim 3 ochkoni qo‘lga kiritdi.

Mazkur o‘yinning 10-daqiqasida “Real” hujumchisi Mbappe hisobni ochdi. Afsuski, Kilian 36-daqiqada jarohat tufayli maydonni tark etdi. 45+2-daqiqada “Atalanta” futbolchisi de Ketelare 11 metrlik jarima to‘pini aniq bajarib, hisobni tenglashtirdi. Ikkinchi bo‘limning 56-daqiqasida Vinisius Junior, 59-daqiqada esa Bellingem gol urib, hisobni 1:3 ko‘rinishiga olib keldi. Biroq, 65-daqiqada Lukman hisobni biroz qisqartirdi.

Ma’lumot o‘rnida: Kilian Mbappe oyog‘ining son qismida og‘riq sezgan va harakatlanishda muammolarga uchragan. Bugun futbolchi tibbiy ko‘rikdan o‘tadi va qancha muddat safdan chiqqani ma’lum bo‘ladi. Mbappe joriy mavsumda barcha turnirlarda 21 ta uchrashuvda qatnashib, 11 ta gol va ikkita assist muallifi bo‘ldi.

Turning yana bir gollarga boy o‘yini “Veltins-Arena” stadionida bo‘lib o‘tdi. Unda “Shaxtyor” — “Bavariya” klublari o‘zaro to‘qnashdi va uchrashuvda muxlislar jami 6 ta gol guvohi bo‘ldi. O‘yinning 5-daqiqasida mezbonlar vakili Ке́вин de Масе́до tezkor gol urib, hisobni ochdi. Tabiiyki, bu holat “Bavariya” klubiga yoqmadi va jamoa bor e’tiborini hujumga qaratdi. Natijada, 11-daqiqada Laymer hisobni tenglashtirgan bo‘lsa, 45-daqiqada Myuller gol urib, jamoasini oldinga olib chiqdi. Ikkinchi bo‘limning 70-daqiqasida Olise penaltini aniq bajarib, jamoasining uchinchi goliga mualliflik qildi.

Oradan 17 daqiqa o‘tib Musiala “Shaxtyor” darvozasiga to‘rtinchi to‘pni kiritdi. Bahsning 90+3 daqiqasida Olise yana o‘z nomini tabloga yozdirib qo‘ydi. Yirik 1:5 hisobidagi g‘alaba evaziga “Bavariya” ochkolarini 12 taga yetkazib oldi.

Mahobatli “Red Bull Arena” stadionida “RB Zalsburg” o‘z muxlislarini hafa qildi. Bunga sabab esa “PSJ” klubining yirik 0:3 hisobidaga g‘alabasi bo‘ldi. Parij shahri sharafini himoya qiladigan “PSJ” ketma-ket ikki mag‘lubiyatdan so‘ng nihoyat 3 ochkoni qo‘lga kiritdi. Gonsalu Ramush, Mendesh va Dezire Due gollarga mualliflik qildi.

Shuningdek, musobaqaning 6-turida “Bayer” – “Inter” 1:0, “RB Leypsig” — “Aston Villa” 2:3,  “Bryugge” — “Sporting” 2:1, “Brest” — PSV 1:0, “Dinamo Zagreb” — “Seltik” 0:0 hisobidagi natijalar qayd etildi.

Bugun, 11 dekabr kunidan 12 dekabr kuniga o‘tar kechasi quyidagi bahslar bo‘lib o‘tadi:

22:45 “Atletiko Madrid” – “Slovan Br”;

22:45 “Lill” – “Shturm” ;

01:00 “Yuventus” – “Manchester Siti” ;

01:00 “Borussiya D” – “Barselona” ;

01:00 “Benfika” – “Bolonya” ;

01:00 “Arsenal” – “Monako” ;

01:00 “Milan” – “Srvena Zvezda” ;

01:00  “Feyenoord” – “Sparta Praga” ;

01:00 “Shtutgart” – “Yang Boyz”. ;

Javohir Toshxo‘jayev,  

O‘zA