“Yangi O‘zbekiston” va “Pravda Vostoka” gazetalari tahririyatining yuz.uz sayti O‘zbekiston hamda jahon yangilik va xabarlarini qoraqalpoq tilida ham yoritishni boshladi.

Bu, albatta, aholimizning qoraqalpoq tilida so‘zlashuvchi vakillarini to‘g‘ri, xolis va rasmiy axborotlar, jumladan, mamlakatimizda kechayotgan izchil ijtimoiy-siyosiy, iqtisodiy islohotlar, yangi qabul qilingan huquqiy-me’yoriy hujjatlar bilan tanishtirishga bo‘lgan yana bir qadamdir.

Shuning bilan birga bu qoraqalpoq tilining rivojlanishi va uning media makonidagi o‘rnining mustahkamlanishiga xizmat qiladi.

Yangiliklarni qoraqalpoq tilida o‘qish uchun sayt sahifasining tepa qismidagi tillar orasidan qoraqalpoqcha tanlanadi va istalgan xabarni bu tilda o‘qish mumkin bo‘ladi.

Ushbu bo‘limda siyosat, iqtisodiyot, fan va ta’lim, turizm hamda sport kabi bir qancha sohalardagi dolzarb xabarlar berib boriladi.

Bundan tashqari, «Yangi O‘zbekiston» gazetasida chop etilgan davrning ruhini beruvchi, zalvorli va muhim masalalar tahliliga oid maqolalarning QR_kodini skaner qilish orqali o‘sha maqolaning qoraqalpoq tilidagi tarjimasini ham o‘qishingiz va havola orqali ekskulyuziv videolarni ko‘rishingiz mumkin.

Eslatib o‘tamiz, yuz.uz sayti hozirgi kunda besh til — o‘zbek, rus, ingliz, qozoq hamda tojik tilida o‘z faoliyatini olib boradi.