FOTOREPORTAJ
Nukus shahridagi Yoshlar markazida Qoraqalpog‘iston Respublikasi shaxmat federatsiyasi, Maktabgacha va maktab ta’limi vazirligi, Yoshlar ishlari agentligi boshqarmasi hamkorligida shaxmat bo‘yicha maktabgacha ta’lim tashkiloti tarbiyalanuvchilari o‘rtasida Respublika birinchiligi musobaqasi o‘tkazildi.
Davlatimiz rahbarining 2021 yil 14 yanvardagi “Shaxmatni yanada rivojlantirish va ommaviylashtirish hamda shaxmatchilarni tayyorlash tizimini takomillashtirish chora-tadbirlari to‘g‘risida”gi qarori ijrosi doirasida tashkil etilgan musobaqada Nukus shahri va tumanlar maktabgacha ta’lim tashkilotlarining 5-7 yoshli 70 nafardan ziyod tarbiyalanuvchisi ishtirok etdi.
Yakuniy natijalarga ko‘ra, o‘g‘il bolalar o‘rtasida Nukus shahridagi 8-maktabgacha ta’lim tashkiloti tarbiyalanuvchisi Alpomish Baxtiyorov birinchi o‘rinni egalladi. Qizlar bahsida Nukus tumanidagi “Sovyonok” nomli davlat-xususiy sherikligi asosidagi maktabgacha ta’lim tashkiloti tarbiyalanuvchisi Shahzoda Yerejepova g‘olib bo‘ldi.
Musobaqaning jajji g‘olib va sovrindorlari tashkilotchilar tomonidan medal, diplom va esdalik sovg‘alari bilan taqdirlandi.
Maqsad HABIBULLAEV(surat),O‘zA