Kuni kecha Toshkent shahrining Mirzo Ulug‘bek (26,71 ga), Sergeli (35,15 ga), Shayxontoxur (36,82 ga), Chilonzor (5,02 ga), Yashnobod (54,67), Yakkasaroy (13,03 ga) tumanlarida renovatsiya hududlarining chegarasini belgilash hamda ushbu hududda loyihalarni amalga oshirish to‘g‘risidagi shahar hokimining qarori e’lon qilindi.
Mazkur holatga Tadbirkorlar va ishbilarmonlar harakati – O‘zbekiston Liberal-demokratik partiyasi o‘z munosabatini bildirdi.
Unda qayd etilishicha, O‘zLiDeP partiyasi renovatsiya dasturlarini amalga oshirish avariya holatidagi qo‘p qavatli turar joylarni yangilashda muhim o‘rin tutishini e’tirof etadi.
Ayni paytda bu dasturlar fuqarolar va tadbirkorlik sub’ektlariga tegishli bo‘lgan yakka tartibdagi turar joylar hamda noturar joylar daxlsizligiga rahna solmasligi shart, deb hisoblaydi.
O‘zbekiston Respublikasi Vazirlar Mahkamasining 2024 yil 25 martdagi 149-sonli qarori bilan belgilangan renovatsiya qoidalari mazmun jihatidan ko‘p qavatli turar joylarda renovatsiyani amalga oshirish tartibini belgilab beradi.
Biroq, bu tartibni fuqarolar va tadbirkorlik sub’ektlariga tegishli yakka tartibdagi turar joylar hamda ko‘p qavatli turar joylardan alohida noturar joylarga tatbiq etish maqsadga muvofiq emas. Chunki amaldagi qonunlarimizda bu borada mulkdorlar huquqlarini kafolatlash bo‘yicha aniq mexanizmlar nazarda tutilgan. Bu, avvalo,buzilishi belgilangan mol-mulk egasining roziligini olish, mol-mulkning bozor qiymati va yetkazilgan zarar o‘rnini oldindan kompensatsiya qilish talabi bilan bog‘liqdir.
Qolaversa, yakka tartibdagi turar va noturar joylar yerlari xususiylashtirilgan bo‘lsa, Yer kodeksi hamda“Qishloq xo‘jaligiga mo‘ljallanmagan yer uchastkalarini xususiylashtirish to‘g‘risida”gi qonunga muvofiq ular tegishli yer uchastkalari bilan birga qayta sotib olingan taqdirdagina renovatsiya qilinishi mumkin.
Shu bois, partiya renovatsiya loyihalarini amalga oshirishda shoshmashosharlikka yo‘l qo‘ymaslik va bu borada tegishli qonun qabul qilingandan so‘ng amaliy ishlar qilish mumkinligini ta’kidlagan.
M.Komilova, O‘zA