29 va 30 iyun kunlari Bo‘stonliq tumanida o‘z irodasini sinab ko‘rish, “Amirsoy”ning jozibador tabiati va manzaralaridan bahra olish hamda dam olish kunlarini tog‘da faol o‘tkazishni o‘z ichiga olgan “Sky Camp Bo‘stonliq – 2024” tog‘ sport festivali bo‘lib o‘tadi.
O‘zbekiston Madaniyat va san’atni rivojlantirish jamg‘armasi, Sport vazirligi va Toshkent viloyati hokimligi va bir qator boshqa tashkilotlar tomonidan tashkil etilayotgan festivalda ishtirokchilar velopoyga, treyl yugurish, skayranning, yoga va meditatsiya kabi yo‘nalishlarda o‘z imkoniyatlarini sinovdan o‘tkazadi.
Shuni ta’kidlash lozimki, mamlakatimizda birinchi marta treyl yugurish trassasi va yuguruvchilarga shaxsiy hisob uchun ochkolar olish imkonini beruvchi guvohnoma beriladi.
2024 yilda “Samarkand Marathon” xalqaro xayriya poygalari turkumiga besh yil to‘lishi munosabati bilan o‘tkaziladigan “Sky Camp Bo‘stonliq – 2024” tog‘ festivali ishtirokchilari va mehmonlarini quyidagi musobaqalar va tadbirlar kutmoqda:
• Sky Camp BIKE – tog‘ yo‘l velopoygasi. Masofasi 13,5 km, balandlikka ko‘tarilish – 691 m;
• Sky Camp TRAIL – 10 va 20 km.lik, balandlikka ko‘tarilish – 619 m va 1238 m bo‘lgan noravon joylarda yugurish.
• Sky CAMP PEAK – Amirsoyning pastki bekatidan yuqori bekatiga qadar 4,2 km.lik balandlikka ko‘tarilishi 724 m bo‘lgan tog‘ cho‘qqisiga chiqish poygasi;
• Sky Camp ZEN – yugurish, yoga va meditatsiyani birlashtiradi;
• 2 kun chiqindilardan tozalab yugurish “plogging” poygasi;
• “Tesla Boy” guruhining konserti.
“Sky Camp TRAIL” Xalqaro treyl yugurish uyushmasi (ITRA)ning guvohnomasiga ega. “Sky Camp Bo‘stonliq – 2024” ishtirok etish uchun ushbu havola orqali (https://events.samarkandmarathon.uz) ro‘yxatdan o‘tish mumkin.
Javohir Toshxo‘jayev, O‘zA