Ayni kunlarda oliy ta’lim muassasalarida adabiy-ma’rifiy haftaligi doirasida “Milliy qadriyatlar sayli” tashkil etilmoqda.

Nukus shahridagi “Istiqlol” bolalar dam olish markazida Samarqand davlat veterinariya meditsinasi, chorvachilik va biotexnologiyalar universiteti Nukus filiali tomonidan ushbu haftalik doirasida ma’rifiy tadbir o‘tkazildi.

Tadbirda filial talaba-yoshlari hamda Respublika “Barkamol avlod” bolalar maktabi o‘quvchilari ishtirokida ko‘ngilochar konsert dasturi uyushtirildi. Konsert davomida qadriyatlarimizni o‘zida tarannum etuvchi kuy-qo‘shiq va qiziqarli chiqishlar namoyish etildi.

Tadbirda talabalar ishtirokida ota-bobolarimiz o‘ynab kelgan qadimiy milliy o‘yinlar, milliy buyumlar ko‘rgazmasi tashkil etildi.

Milliy urf-odatlarimizni va qadriyatlarimizni o‘zida aks ettirgan ushbu tadbir davomida milliy liboslarda sayil o‘tkazildi. Faol ishtirokchilar taqdirlandi.

Dovud Abibullayev, O‘zA muxbiri