XX asrda cho‘kib ketgan “Titanik” kemasining eng boy yo‘lovchisi Jon Astorga tegishli tilla soat Buyuk Britaniyadagi kimoshdi savdosida qariyb 1,5 million dollarga sotildi, deya ma’lum qildi “Sky News” telekanali “Henry Aldridge & Son” kimoshdi savdo uyi bergan ma’lumotlarga tayanib.

“Titanikdagi eng badavlat kishi jasadidan topilgan cho‘ntak soati 1,175 million funt sterlingga sotildi”, – deb xabar tarqatdi mazkur telekanal. Ta’kidlanishicha, avvaliga soatni 100-150 ming funt sterling oralig‘ida sotish rejalashtirilgan edi.

“Henry Aldridge & Son” kimoshdi savdo uyining ma’lum qilishicha, ushbu soat “Titanik” kemasidan topilgan va savdoga qo‘yilgan buyumlar orasida eng qimmati hisoblanadi.

Tarixdan ma’lumki, Britaniyaning eng yirik yo‘lovchi kemasi – “Titanik” 1912-yil 14-aprelda o‘zining birinchi safarini amalga oshirayotganda muz tog‘iga urilib cho‘kib ketgandi. “Asr halokati” deb ta’rif berilgan ushbu voqea taxminan 1,5 ming kishining okean tubiga g‘arq bo‘lishiga sababchi bo‘lgan.