Bugun Kalkutta shahrida Hindiston Bosh vaziri Narendra Modi ishtirokida mamlakatdagi ilk suv osti metrosining ochilish marosimi o‘tkazildi. Bu haqda “India Today” nashri xabar tarqatdi.
Yangidan bunyod etilgan metro temir yo‘li xizmatlariga Kalkuttaning “Kavi Subhash”, “Majerhat” va “Esplanade” bekatlari kiradi.
Suv osti metrosi “Hovrah-Maydan-Esplanade” yo‘nalishlarining bir qismi bo‘lib, Xugli daryosi ostidagi 520 metrlik masofani atigi 45 soniyada bosib o‘tishi kutilmoqda.
Marosimdan so‘ng Bosh vazir bir nechta maktab o‘quvchilari bilan suv osti metrosida bo‘ldi.
— Ochilish marosimi bugun bo‘lib o‘tganiga qaramay, yo‘lovchilarga xizmat ko‘rsatish kechroq boshlanadi, -dedi Sharqiy temir yo‘lning jamoatchilik bilan aloqalar bo‘yicha Bosh direktori Kaushik Mitra.
2023-yil aprel oyida Kalkutta metrosi sinovlar paytida suv osti tunnelidan poyezdni o‘tkazib, Hindiston tarixiga kirgan edi.