Prezident Shavkat Mirziyoev 21-iyul kúni neft-gaz tarawında sırt el sherikleri menen ámelge asırılıp atırǵan jumıslar hám gúzgi-qısqı máwsimge tayarlıq ilajlarına baylanıslı prezentaciya menen tanıstı.

Mámleketimizde ósip baratırǵan talapqa sáykes túrde energetika izbe-iz rawajlandırılmaqta. Mámleketimiz basshısınıń sırt elge saparları hám olar sheńberinde ótken biznes forumlar nátiyjesinde kóplegen joybarlar ámelge asırılmaqta.

Sonıń ishinde, Ázerbayjannıń “Socar” kompaniyası menen Ústirttegi kánlerde izlew ótkerip, neft qazıp alıw boyınsha kelisimge erisilgen. Birgelikte perspektivalı maydanlarda geologiyalıq-izlew jumısların alıp barıw rejelestirilgen.

Sonday-aq, basqa da sırt mámleketler menen quramalı kánlerdi ózlestiriw, tarawdı sanlastırıw, talap joqarı bolǵan qánigelerdi tayarlaw sıyaqlı áhmiyetli baǵdarlarda birge islespekte.

Prezentaciyada juwapkerler sherikliktegi jumıslardıń barısı hám gezektegi rejeler boyınsha málimleme berdi.

Prezidentimiz perspektivalı maydanlar boyınsha anıq joybarlardı qáliplestiriw, geologiyalıq-izlew jumıslarınan tayar ónim alıwǵa shekemgi tolıq shınjırdı jolǵa qoyıw boyınsha kórsetpeler berdi.

Sonıń menen birge, ámeldegi sırt el hám birgeliktegi kárxanalarda jańa burawlaw usılların qollanıw, qudıqlardıń nátiyjeliligin arttırıw arqalı neft hám gaz kólemin kóbeytiw zárúr ekenligi atap ótildi.

Májiliste gúzgi-qısqı máwsimge tayarlıq máseleleri de kórip shıǵıldı. Juwapkerler bul ushın jeterli energiya islep shıǵarıw, gaz qoymaxanalarında toplaw hám teń salmaqlı jetkerip beriw ilajları kórilip atırǵanı haqqında málimleme berdi.

Atap aytqanda, Talımarjan ıssılıq elektr stanciyasında 1 mıń 65 megavattlı eki puw-gaz qurılması, Sırdáryada 1 mıń 573 megavattlı ıssılıq elektr stanciyası qurılmaqta. Olardıń jámi quwatlılıǵı jılına 20 milliard kilovatt-saat boladı.

Sonday-aq, bıyıl Tashkent, Namangan, Qashqadárya hám Surxandárya wálayatlarında jámi 162 megavattlı jańa gidroelektr stanciyaları iske qosıladı. Olarda jılına 648 million kilovatt-saat elektr islep shıǵarıladı. Bular, bárinen burın, xalqımızdıń talabı hám ósip baratırǵan ekonomika ushın qosımsha kúsh boladı.

Házirgi waqıtta tiyisli tarmaq hám podstanciyalardı ońlaw jumısları da baslanǵan. Íssılıq stanciyalarınıń turaqlı islewi ushın zárúr janılǵı, komplektlewshi hám awısıq bólekler rezervleri qáliplestirilmekte.

Májiliste taraw infrastrukturasın izbe-iz modernizaciyalap, energiya jetkerip beriwdiń úzliksizligin támiyinlew boyınsha wazıypalar belgilendi.

ÓzA