Бугунги кунда рақамлаштириш жараёнлари иқтисодиётнинг барча жабҳаларига, хусусан, корпоратив бошқарув тизимига ҳам шиддат билан кириб бормоқда.

Қимматли қоғозлар Марказий депозитарийсининг “E-VOTE — Электрон овоз бериш” платформаси ушбу йўналишдаги ислоҳотларнинг амалий натижаси бўлиб, 2025 йил якунлари корпоратив секторда рақамли ишонч янги босқичга кўтарилганини кўрсатмоқда.

Ўтган йил давомида жами 19 та йирик акциядорлик жамияти ўз корпоратив тадбирларини Марказий депозитарийнинг рақамли инфратузилмасига ишониб топширди. Жами ўтказилган 49 та умумий йиғилишнинг салмоқли қисми, яъни 31 таси навбатдан ташқари йиғилишлар ҳиссасига тўғри келиши компанияларнинг тезкор ва стратегик қарорларни қабул қилишда айнан E-VOTE платформасига таянаётганидан далолат беради.

Мазкур жараёнлар нафақат эмитентлар, балки инвесторлар учун ҳам қулайлик яратиб, йиғилишларда иштирок этиш географиясини кенгайтирди. 2025 йилда платформа орқали жами 822 нафар акциядор ўз ҳуқуқларидан фойдаланган ҳолда масофавий овоз берди. Уларнинг 324 нафари йиллик, 498 нафари эса навбатдан ташқари йиғилишларда қатнашгани акциядорларнинг жамият бошқарувидаги фаоллиги ортганини тасдиқлайди.

Бугунги кунда E-VOTE нафақат оддий овоз бериш воситаси, балки корпоратив муносабатлар учун кенг қамровли рақамли экотизимга айланган.

Платформа акциядорлик жамиятларининг умумий йиғилишларидан ташқари, Кузатув кенгашлари мажлисларини ҳамда масъулияти чекланган жамиятлар таъсисчиларининг йиғилишларини масофавий форматда, ҳуқуқий жиҳатдан мукаммал тарзда ўтказиш имконини беради.

Тизимнинг OneID (Ягона идентификация тизими) билан интеграция қилингани ҳар бир иштирокчининг шахсини ишончли тасдиқлашда ва овоз бериш натижаларининг дахлсизлигини таъминлашда юқори хавфсизлик даражасини кафолатлайди.

Эслатиб ўтамиз, Марказий депозитарий корпоратив тадбирларни онлайн форматга ўтказиш ва бозор инфратузилмасини модернизация қилиш мақсадида ушбу хизматни 2020 йилда жорий этган эди. Ўша пайтдаги инновацион қадам бугун мамлакатимиз капитал бозорида корпоратив бошқарувнинг ажралмас ва стандарт воситасига айланди.

E-VOTE платформасининг оммалашиши вақтни тежаш, ташкилий харажатларни қисқартириш ҳамда корпоратив бошқарувда шаффофликни таъминлаш йўлидаги стратегик ютуқдир. Марказий депозитарий келгусида ҳам молия бозорини рақамлаштириш ва инвесторлар учун инновацион ечимларни тақдим этишда давом этади.

Ҳамроз Баянов, ЎзА