Ótken jılı “Jasıl mákan” ulıwma milliy joybarı sheńberinde mámleketimizde 403 gektardan aslam jerde “jasıl belbew,” “jasıl baǵ” hám “jasıl jámiyetlik parkler” qurılǵan.
Sonday-aq, shólleniw hám qum kóshiwi, suw hám topıraq eroziyasınıń aldın alıw jáne ekologiyalıq ortalıqtı jaqsılaw maqsetinde derlik 3,3 mıń gektar maydanda qorǵalatuǵın toǵaylıqlar jaratılǵan. Toǵay xojalıqlarında 35,7 million túpten aslam nál jetistirilgen.
Oliy Majlis Nızamshılıq palatasındaǵı Ózbekstan Ekologiyalıq partiyası frakciyası hám Ekologiya hám qorshaǵan ortalıqtı qorǵaw máseleleri komiteti tárepinen Ekologiya hám klimat ózgeriwi milliy komitetiniń “2025-jılda byudjet qárejetleriniń maqsetli indikatorları orınlanıwı boyınsha ámelge asırılǵan jumıslar haqqında”ǵı málimlemesi tıńlandı.
Atap ótilgenindey, komitet tárepinen mámleketlik byudjet qarjılarınan nátiyjeli paydalanıw nátiyjesinde qorshaǵan ortalıqtı hám tábiyǵıy resurslardı qorǵaw, klimat ózgerislerin jumsartıw hám shólleniwge baylanıslı jumıslar ámelge asırılǵan.
Atap aytqanda, ótken jılı ekonomikalıq áhmiyetke iye bolǵan 70 túrdegi jabayı ósimlik, 91 túrdegi haywanlar mámleketlik kadastrǵa kirgizilgen. Sol arqalı biokóptúrlilikti saqlaw, siyrek ushırasatuǵın túrlerdi qorǵaw boyınsha ilimiy tiykarlanǵan usınıslar islep shıǵılǵan.
Sanitariyalıq tazalaw baǵdarlaması sheńberinde 18 shıǵındı poligonı rekultivaciyalanıp, topıraq qatlamı menen jabıw jumısları ámelge asırılǵan. Bul bolsa shıǵındılardıń qorshaǵan ortalıqqa tásirin azaytıw, elatlı punktlerde ekologiyalıq jaǵdaydı jaqsılawǵa xızmet etpekte.
Dodalawlar dawamında deputatlar mámleketlik byudjet qárejetleri ushın ajıratılǵan qarjılardıń tolıq ózlestirilmegen jaǵdaylarına itibar qarattı. Sonıń menen birge, tábiyattı qorǵawda byudjet qarjılarınan maqsetli paydalanıw boyınsha bir qatar usınıslar berildi.

M.Komilova, ÓzA