Tariyxıy maǵlıwmatlarǵa qaraǵanda, bayraqlar áyyemgi zamanlardan beri bar bolǵan. Olar dáslep sawash maydanlarında áskeriy shtabtıń jaylasqan jerin belgilew hám áskerlerdi tártipke salıw ushın paydalanılǵan.
Atap aytqanda, áyyemgi grekler tayaqlarǵa ildirilgen gezlemelerge hárip yamasa belgi túsirip, onı bayraq sıpatında paydalanǵan. Bul gezlemeler sawash maydanında áskeriy birlikti ajıratıw hám identifikaciyalaw ushın xızmet etken. Al, áyyemgi Rimde bolsa, dáslepki bayraq sıpatında vexillum qollanılǵan. Bul nayza ushına biriktirilgen kvadrat formasındaǵı gezleme bolıp, sárkarda yaki armiya belgisin bildirgen. Vexillumlar tek ǵana sawashlarda emes, al, rásmiy máresimlerde de qollanılǵan. Sonlıqtan olar keyin ala xalıq hám mámlekettiń ayrıqsha belgisi sıpatında qáliplese baslaǵan.
Bayraqtıń bul áyyemgi formaları házirgi dáwir mámleketlik bayraqlarınıń payda bolıwı hám simvolikalıq áhmiyetin túsiniwde negizgi tariyxıy tiykar boladı. Solay etip, bayraqlar dáslep áskeriy ámeliyattan kelip shıqqan bolsa da, waqıt ótiwi menen mámleket hám xalıqtıń birliginiń tımsalı sıpatında rawajlanǵan.

Internet materialları tiykarında tayarlaǵan:
Biybisara Jartıbaeva,
Berdaq atındaǵı QMUdıń 2-kurs magistrantı.
Qaraqalpaqstan xabar agentligi.